«Толибон» ҳаракати Афғонистонда қўзғолон уюштиришидан хавфсираб, ўзининг ўзбек қўмондонларини уй қамоғига жойлаштирди, деб ёзади «Интерфакс».
Фарёб вилоятида толиблар ўзбек қўмондонларидан бири Ҳожига ҳаж сафарига боришга рухсат бермади, у уй қамоғига юборилди. Hasht-e Subh газетасига маҳаллий манбалар маълум қилишича, толибларнинг разведка хизмати ва мудофаа вазирлиги бир ой мобайнида Фарёбдаги ўзбек қўмондонларининг ҳаракатланишини кузатиб борган.
Таъкидланишича, «Толибон»нинг ўзбек қўмондонлари махдум Аълам Раббоний, Қори Салоҳиддин Аюбий ва командир Тўфон пуштун толибларга қарши исён кўтариши мумкинлигидан хавфсираб, уй қамоғига юборилган.
Пуштун ва пуштун бўлмаган толиблар қўмондонлари ўртасидаги зиддиятлар мамлакат шимолида сўнгги икки ой ичида кучайди.
Аввалроқ «Толибон» ҳаракати 28 июнь куни Сарипул вилоятида ҳазорлар қўмондони Мавлавий Маҳдий исёни бостирилганини эълон қилган эди.
«Сарипул вилояти губернатори Муҳаммад Ёқуб Абдул Раҳмон Ака бугун хавфсизлик билан боғлиқ вазиятни баҳолаш учун вилоятнинг Балхоб туманига ташриф буюрди. Губернаторнинг хабар беришича, Балхобда одамларни таъқиб қилган бир қанча исёнчилар қўлга олинган, хавфсизлик тикланган ва одамлар тўлиқ хавфсизликда яшаяпти». Бу ҳақда «Толибон» назорат қилаётган Афғонистондаги ягона давлат ахборот агентлиги бўлмиш Bakhtar нашри ёзган.
Шу билан бирга, Мавлавий Маҳдийнинг ўзи мағлубиятни тан олгани йўқ.
Толибларнинг Балхобга бостириб кириши ва тинч аҳоли орасидаги қурбонлар ҳақидаги хабарларнинг эълон қилиниши халқаро майдонда норозиликни келтириб чиқарди. Amnesty International бу ҳудудда оддий фуқароларнинг қатл қилинишидан хавотирда эканини билдириб, дунё Афғонистонда инсон ҳуқуқлари бузилишини эътиборсиз қолдирмаслиги кераклигини айтди.
БМТ махсус маърузачиси Ричард Беннетт ҳам толибларнинг ваҳшиёна ҳаракатларидан ташвишда эканини маълум қилганди. 27 июнь, душанба куни у Балхоб вилоятида ноқонуний қотилликлар, мажбурий кўчиришлар, мол-мулкнинг йўқ қилиниши ва бошқа қонун бузилишлари ҳақидаги хабарлар хавотир уйғотишини ёзганди. Беннеттнинг сўзларига кўра, интернет ва телекоммуникация тармоқлари ўчириб қўйилгани туфайли, бу хабарларни текшириш қийин. Шунга қарамай, у томонларни халқаро гуманитар ҳуқуққа риоя қилишга чақирди.
Изоҳ (0)