Toshkent viloyati Yangiyo‘l tumanida 26-iyun kuni yuk avtomashinasi va avtobus ishtirokida yo‘l-transport hodisasi sodir bo‘ldi. Bu haqda viloyat Yo‘l harakati xavfsizligi boshqarmasi xabar qildi.
Qayd etilishicha, holat shu kuni soat 07:00 larda M-39 Toshkent—Termiz yo‘lining 825-chaqirimida sodir bo‘lgan. Haydovchi A.S. (1997-yilda tug‘ilgan) Isuzu yuk avtomashinasini Chinoz—Toshkent yo‘nalishida boshqarib ketayotib, o‘ziga nisbatan bir yo‘nalishda oldinda harakatlanib ketayotgan haydovchi A.Ch. (1963-yilda tug‘ilgan) boshqaruvidagi Isuzu avtobusining orqa qismiga borib urilgan.
YTH oqibatida avtobusi yo‘lovchisi bo‘lgan ayol F.O. (1997-yilda tug‘ilgan) olgan tan jarohati bilan voqea joyida vafot etgan. Shuningdek, yuk avtoulovi yo‘lovchisi B.S. (2000-yilda tug‘ilgan) tan jarohati bilan jonlantirish bo‘limiga yotqizilgan.
Avtobusdagi boshqa yo‘lovchilarga ham birinchi yordam ko‘rsatilgan.
Dastlabki ma’lumotlarga ko‘ra, YTHga Isuzu yuk mashinasi haydovchisining uxlab qolishi sabab bo‘lgan. Hozirda holat yuzasidan surishtiruv ishlari olib borilmoqda.
Avvalroq Surxondaryoda Isuzu va “KamAZ” to‘qnashib, yonib ketgani, Namanganda yuk mashinasi Damas’lar ortilgan treylerga kelib urilgani, Jizzaxda YTH sabab Isuzu saloniga qisilib qolgan haydovchi qutqarilgani xabar qilingan.
Izoh (0)