Тошкент вилояти Янгийўл туманида 26 июнь куни юк автомашинаси ва автобус иштирокида йўл-транспорт ҳодисаси содир бўлди. Бу ҳақда вилоят Йўл ҳаракати хавфсизлиги бошқармаси хабар қилди.
Қайд этилишича, ҳолат шу куни соат 07:00 ларда М-39 Тошкент—Термиз йўлининг 825-чақиримида содир бўлган. Ҳайдовчи А.С. (1997 йилда туғилган) Isuzu юк автомашинасини Чиноз—Тошкент йўналишида бошқариб кетаётиб, ўзига нисбатан бир йўналишда олдинда ҳаракатланиб кетаётган ҳайдовчи А.Ч. (1963 йилда туғилган) бошқарувидаги Isuzu автобусининг орқа қисмига бориб урилган.
ЙТҲ оқибатида автобуси йўловчиси бўлган аёл Ф.О. (1997 йилда туғилган) олган тан жароҳати билан воқеа жойида вафот этган. Шунингдек, юк автоулови йўловчиси Б.С. (2000 йилда туғилган) тан жароҳати билан жонлантириш бўлимига ётқизилган.
Автобусдаги бошқа йўловчиларга ҳам биринчи ёрдам кўрсатилган.
Дастлабки маълумотларга кўра, ЙТҲга Isuzu юк машинаси ҳайдовчисининг ухлаб қолиши сабаб бўлган. Ҳозирда ҳолат юзасидан суриштирув ишлари олиб борилмоқда.
Аввалроқ Сурхондарёда Isuzu ва «КамАЗ» тўқнашиб, ёниб кетгани, Наманганда юк машинаси Damas’лар ортилган трейлерга келиб урилгани, Жиззахда ЙТҲ сабаб Isuzu салонига қисилиб қолган ҳайдовчи қутқарилгани хабар қилинган.
Изоҳ (0)