Toshkent viloyatidagi Zangiota 1-son yuqumli kasalliklar shifoxonasi direktori Anvar Husanov muassasadagi bemor bolalar va homilador ayollar haqida ma’lumot berdi.
“Bilamizki, koronavirus o‘ta yuqumli xastalik bo‘lib, boshqalarga qaraganda homilador ayollar uni yuqtirishga ancha moyil. Sababi bo‘lajak onalarda homiladorlik tufayli immunitet pasayib ketadi. Qolaversa, ushbu infeksiya bolalarni ham tez-tez zararlaydi.
Xususan, hozirgi kunda shifoxonamizda davolanayotgan bemorlarning 155 nafarini bolalar, 23 nafarini chaqaloqlar tashkil etadi. Jonlantirish bo‘limida 4 nafar bola shifokor va hamshiralar nazorati ostida davo muolajalarini olmoqda”, — deydi shifokor.
Shuningdek, muassasada 170 nafar homilador ayol ham davolanmoqda. Joriy yil boshidan buyon shifoxonada 147 nafar chaqaloq tug‘ilgan.
Ma’lumot uchun, o‘tgan yili ushbu muassasada 442 nafar chaqaloq dunyoga kelgan.
Eslatib o‘tamiz, O‘zbekistonda koronavirus bilan kasallanish holati bir necha kundan buyon ortmoqda. Jumladan, 25-iyun kuni mamlakat bo‘ylab 139 kishida kasallik aniqlandi va pandemiya boshidan beri koronavirusga chalingani rasman tasdiqlanganlar soni 240 345 nafarga yetdi. Shuningdek, 24-iyunda — 119 kishida, 22-iyunda — 98 kishida, 19-iyunda — 93 kishida, 18-iyunda 108 kishida, 17-iyunda 90 kishida, 16-iyunda 59 kishida kasallik qayd etilgan.
23-iyun kuni Sanitariya-epidemiologik osoyishtalik va jamoat salomatligi xizmati boshlig‘i Bahodir Yusupaliyev O‘zbekistonda koronavirus omikron shtammining eng yuqumli deb aytilayotgan Stealth-Omicron BA.2 varianti aniqlanganini ma’lum qilgandi.
Izoh (0)