Davlat Bobonov dzyudo bo‘yicha “Ulkan toj” turkumiga kiruvchi musobaqada kumush medaliga ega chiqdi

Mo‘g‘ulistonning Ulan-Bator shahrida dzyudo bo‘yicha “Ulkan toj” turkumiga kiruvchi xalqaro musobaqa o‘tkazilmoqda.

26-iyun kuni -90 kg vazn toifasida O‘zbekiston sharafini himoya qilgan Davlat Bobonov medallar uchun kurash olib bordi. Bobonov finalga qadar mag‘lubiyatsiz yetib bordi. Hal qiluvchi bahsda rossiyalik Mixail Igolnikovga imkoniyatni boy berdi va kumush medal bilan cheklandi.

Shu tariqa o‘zbekistonlik sportchi mazkur natija orqali jahon reytingi uchun 700 ochko, Parij—2024 Olimpiadasi yo‘lida esa 350 ochkoni qo‘lga kiritdi. Mazkur reyting ochkosi evaziga Bobonovni o‘z vazn toifasida jahon reytingi yetakchisiga aylanadi, deya ma’lum qilmoqda MOQ matbuot xizmati.

Shu tariqa O‘zbekiston dzyudo terma jamoasi musobaqani 1 ta oltin, 1 ta kumush va ikkita bronza medali bilan yakunladi.