Gazeta.uz saytida 2020-yil Namangan viloyatining Chortoq tumanidagi adirlikda tashkil etilgan 1000 ta issiqxonaning 95 foizi yaroqsiz holda ekani, 6,7 mlrd so‘m subsidiya va 6,3 mlrd so‘m imtiyozli kredit mablag‘lari evaziga qurilgan issiqxonalar faoliyat yuritmayotgani xabar berilgandi. Mehnat vazirligi holatga izoh berdi.
Vazirlik axborot xizmati rahbari Mavjuda Mirzayevaning “Daryo”ga ma’lum qilishicha, mas’ullar 25-iyun kuni voqea joyiga borib vaziyatni o‘rgangan.
“Biz voqea joyiga kelib, mutasaddilar, tadbirkorlar va issiqxona egalari bilan suhbatlashdik. Issiqxona egalari bizning ‘vaziyat nega bu darajaga yetib keldi’, degan savolimizga suv yo‘qligi sabab deb javob berishdi. Ammo mas’ullarning aytishicha, suv yetarli, mana bunday suv idishlar orqali har bir issiqxona suv bilan ta’minlangan”, — deydi bu haqda jamoatchilikka videomurojaat qilgan mas’ul.
Vazirlik axborot xizmati rahbarining qo‘shimcha qilishicha, ishlamayotgan va qarovsiz holda yotgan issiqxonadan 5 metr narida pomidor ekilib, faoliyati davom etayotgan issiqxona ham bor.
“Bu issiqxona egasi erta tongdan issiqxonasiga kelib mehnat qiladi. Berilgan imkoniyatdan to‘g‘ri foydalanadi. Shuning uchun ham uning issiqxonasi daromad olib kelmoqda. Qarovsiz issiqxona egasi esa issiqda mehnat qilish yoqmas, balki. Ne bo‘lganda ham xulosa esa har kimning o‘ziga”, — deydi Mavjuda Mirzayeva.
Vazirlik vakillarining qo‘shimcha qilishicha, holat obdon o‘rganilgach, batafsil ma’lumot beriladi.
Gazeta.uzning eslatishicha, 2020-yil iyun oyida prezident Shavkat Mirziyoyev Namangan viloyatiga tashrifi doirasida Chortoq tumanida issiqxonalar majmuasini barpo etish loyihasi bilan tanishgan. Baland adir dashtliklarida uzoq yillar davomida foydalanilmagan 36 gektar maydondagi har biri 2 sotixli 1000 ta issiqxona loyihasi “Golden Nats Namangan” agro tomorqa xizmati MCHJ hamkorligida amalga oshirilayotgani aytilgandi.
Izoh (0)