Gazeta.uz сайтида 2020 йил Наманган вилоятининг Чортоқ туманидаги адирликда ташкил этилган 1000 та иссиқхонанинг 95 фоизи яроқсиз ҳолда экани, 6,7 млрд сўм субсидия ва 6,3 млрд сўм имтиёзли кредит маблағлари эвазига қурилган иссиқхоналар фаолият юритмаётгани хабар берилганди. Меҳнат вазирлиги ҳолатга изоҳ берди.
Вазирлик ахборот хизмати раҳбари Мавжуда Мирзаеванинг «Дарё»га маълум қилишича, масъуллар 25 июнь куни воқеа жойига бориб вазиятни ўрганган.
«Биз воқеа жойига келиб, мутасаддилар, тадбиркорлар ва иссиқхона эгалари билан суҳбатлашдик. Иссиқхона эгалари бизнинг ‘вазият нега бу даражага етиб келди’, деган саволимизга сув йўқлиги сабаб деб жавоб беришди. Аммо масъулларнинг айтишича, сув етарли, мана бундай сув идишлар орқали ҳар бир иссиқхона сув билан таъминланган», — дейди бу ҳақда жамоатчиликка видеомурожаат қилган масъул.
Вазирлик ахборот хизмати раҳбарининг қўшимча қилишича, ишламаётган ва қаровсиз ҳолда ётган иссиқхонадан 5 метр нарида помидор экилиб, фаолияти давом этаётган иссиқхона ҳам бор.
«Бу иссиқхона эгаси эрта тонгдан иссиқхонасига келиб меҳнат қилади. Берилган имкониятдан тўғри фойдаланади. Шунинг учун ҳам унинг иссиқхонаси даромад олиб келмоқда. Қаровсиз иссиқхона эгаси эса иссиқда меҳнат қилиш ёқмас, балки. Не бўлганда ҳам хулоса эса ҳар кимнинг ўзига», — дейди Мавжуда Мирзаева.
Вазирлик вакилларининг қўшимча қилишича, ҳолат обдон ўрганилгач, батафсил маълумот берилади.
Газета.узнинг эслатишича, 2020 йил июнь ойида президент Шавкат Мирзиёев Наманган вилоятига ташрифи доирасида Чортоқ туманида иссиқхоналар мажмуасини барпо этиш лойиҳаси билан танишган. Баланд адир даштликларида узоқ йиллар давомида фойдаланилмаган 36 гектар майдондаги ҳар бири 2 сотихли 1000 та иссиқхона лойиҳаси «Golden Нац Наманган» агро томорқа хизмати МЧЖ ҳамкорлигида амалга оширилаётгани айтилганди.
Изоҳ (0)