Ijtimoiy tarmoqlarda “Qo‘yliq” bozorini shahar ehtiyojlari uchun olib qo‘yish masalasi qizg‘in muhokamalarga sabab bo‘ldi. Toshkent shahar hokimligi holatga munosabat bildirdi.
Qayd etilishicha, ishlar doirasida “Qo‘yliq” dehqon bozorining to‘liq hududi davlat va jamiyat ehtiyojlari uchun olib qo‘yilishi ko‘zda tutilmagan. Asosiy kirish joyi oldidagi avtoturargoh hududining bir qismi va bir nechta vaqtincha savdo qurilmalarining o‘rni qurilish jarayoniga jalb etiladi. Bunda asosiy bino va savdo rastalarining aksariyati o‘z joyida qoladi. Loyihaga ko‘ra, jalb etiladigan hududning umumiy maydoni 10 ming kvadrat metr atrofida bo‘ladi.
“Qo‘yliq” buyum bozori ham to‘liq olib qo‘yilmaydi. Bu yerda ham avtoturargoh hududi va bir nechta vaqtincha qurilmalarning o‘rni ishlarga jalb etilib, ular uchun kompensatsiya mablag‘lari to‘lab beriladi. Buyum bozorining ham asosiy paviloni o‘z joyida qoladi. Avtoturargoh hududi bilan birga ishlarga jalb etiladigan umumiy maydon 6,3 ming kvadrat metrni tashkil etadi.
Ishlar yakunidan so‘ng, bozorlarning avtoturargohi xavfsizlik talablarini hisobga olgan holda tegishli ruxsatnoma bo‘lsa, ko‘prik va yondosh yo‘llarning tayanch inshootlari ostida joylashtirilishi mumkin.
“OAVda keltirilayotgan jadval faqatgina obyektlar haqidagi umumiy ma’lumotni aks ettirgan bo‘lib, ular buzilishidan dalolat bermaydi.
Ushbu yer maydonlari yo‘l o‘tkazgich, Bektemir yo‘lidan TXAYga va TXAYdan Bektemir yo‘liga (Farg‘ona yo‘lining davomi) tushuvchi yo‘llar qurilishi sababli davlat va jamoat foydasiga jalb etilmoqda”, — deyiladi xabarda.
Ta’kidlanishicha, hozirgi kunda poytaxtda yo‘l-transport infratuzilmasini takomillashtirish ishlari davom etmoqda. Ushbu yo‘l o‘tkazgich, shu jumladan, uning tarkibidagi yondosh yo‘llar shaharga kirishda transport oqimini tezlashtirish, shaharga kirish qismida tirbandliklarning va avariyaviy holatlarning oldini olishga xizmat qiladi.
“Qo‘yliq” bozori buzilishi yoki ko‘chishi haqida
2021-yilning dekabrida Toshkent shahar hokimligi “Qo‘yliq” dehqon bozori yo‘l kengaytirilishi sabab boshqa joyga ko‘chirilishini ma’lum qilgandi. Bozor Qo‘yliqdan 6,5 kilometr uzoqlikda, Toshkent viloyatida joylashgan Food City savdo majmuasiga ko‘chirilishi haqida xabarlar tarqaldi. Bunday qaror hukumat tomonidan 2017-yildayoq qabul qilinganini ma’lum bo‘ldi.
Bozorda savdo qiluvchi tadbirkorlar bu qarorga norozilik bildirgandi. Bektemir tuman hokimi Tapil Mahamadziyayev esa holatga munosabat bildirib, “o‘zim ham Qo‘yliqdan bozor qilaman, lekin uni ko‘chirmasak bo‘lmaydi”, — degandi.
Shundan so‘ng, “Qo‘yliq” dehqon bozori direktorining xavfsizlik bo‘yicha o‘rinbosari Qodirjon Normirzayev bozor buzilishi yoki ko‘chishi haqida xat yoki og‘zaki topshiriq berilmaganini, yangi ‘most’ hozircha loyiha ekani, uning qurilishiga ma’lum bir vaqt belgilanmaganini ma’lum qildi. Shuningdek, yo‘l o‘tkazgich qurilgan taqdirda ham, bozor orasida katta joy bor, aylanma yo‘l qilib, pastga tushirganda ham, bozorga xalaqit qilmasligini aytgandi.
24-iyun kuni esa Xalq deputatlari Toshkent shahar kengashi raisi Jahongir Ortiqxo‘jayevning 22-iyunda imzolagan qarori bilan “Qo‘yliq” dehqon bozori va “Qo‘yliq” universal savdo majmuasi obyektlari joylashgan yer uchastkalarini davlat va jamoat ehtiyojlari uchun olib qo‘yishga ruxsat berilgani haqida xabar berildi.
Izoh (0)