23-iyun kuni Senatning Yoshlar, madaniyat va sport masalalari qo‘mitasi majlisida kinematografiyani rivojlantirishning ustuvor yo‘nalishlarida belgilangan vazifalar ijrosi yuzasidan Kinematografiya agentligi bosh direktori axboroti eshitildi. Bu haqda parlament yuqori palatasi matbuot xizmati xabar berdi.
Majlisda agentlik tomonidan ushbu yo‘nalishda muayyan ishlar amalga oshirilgani qayt etilgan. Xususan, 2019-2021-yillarda jami 300 ta kino mahsuloti (63 ta badiiy, 126 ta hujjatli film, 10 ta serial, 24 ta multfilm, yosh kino ijodkorlari ishtirokidagi 60 ta qisqa metrajli film, 3 ta bolalar yumoristik kinojurnali, 14 ta videorolik) yaratilgan.
Muhammad Imom Iso Termiziy, Hakim at-Termiziy, Xoja Bahouddin Naqshband, Abdulholiq G‘ijduvoniy, Abu Mu’in Nasafiy, Abdurahmon Jomiy, Alisher Navoiy to‘g‘risida hamda yaqin o‘tmishimizdan hikoya qiluvchi “Islomxo‘ja”, “Qo‘qon shamoli”, “Avloniy” nomli badiiy va hujjatli filmlar suratga olingan.
Xorijiy davlatlarda “O‘zbek kinosi kunlari” tashkil qilinib, unda “Rangsiz tushlar”, “Ilhaq”, “Ibrat”, “Tutqunlik” kabi filmlar namoyish etilgan. Hududlarda kino ijodkorlari ishtirokida filmlar namoyishini nazarda tutuvchi “Kinokarvon” aksiyalari o‘tkazilgan.
Majlisda amalga oshirilgan ishlar bilan bir qatorda belgilangan vazifalar ijrosini ta’minlashda kamchiliklarga ham yo‘l qo‘yilgani qayd etilgan.
Jumladan, “Kinematografiya to‘g‘risida”gi qonun loyihasi belgilangan tartibda Qonunchilik palatasiga kiritilmagan. Kinematografiya sohasida mutaxassis kadrlar tayyorlash, qayta tayyorlash va ularning malakasini oshirishga ixtisoslashtirilgan O‘zbekiston kinematografiya akademiyasi hamda uning qoshida filmlar ijodiy guruhi ikkinchi tarkib mutaxassislarini tayyorlashga ixtisoslashgan o‘rta maxsus ta’lim muassasalari tashkil etilmagan. Respublika hududlarida zamonaviy kinoteatrlar tarmog‘ini barpo etish ishlari yakuniga yetkazilmagan.
Bundan tashqari, agentlikning hududiy bo‘limlari moddiy-texnik bazasi ma’nan eskirgan, to‘liq faoliyat olib borishi uchun zarur sharoitlar yaratilmagan. Ushbu bo‘limlarda kinomarketing yo‘lga qo‘yilmagan. Kinematografiya sohasida qaroqchilikka qarshi kurashish, mualliflik huquqlarini himoya qilish, telekanallar, Internet veb-resurslari va platformalar orqali filmlar namoyishlarini tartibga solish, rag‘batlantirish va jazolash mexanizmlarini amaliyotga joriy etish ishlari yakuniga yetkazilmagan.
Shuningdek, original kino mahsulotlaridan noqonuniy foydalanish hamda kontrafakt kino mahsulotlarini tarqatish, mahalliy telekanallarda xorijiy va milliy kino mahsulotlarini noqonuniy namoyish etishga qarshi kurashish bo‘yicha harakatlar rejasi tasdiqlanmagan. Milliy kinematografiyani rivojlantirish markazi huzurida Axborot multimedia striming platformasi faoliyati yo‘lga qo‘yilmagan. Respublikada faoliyat yuritayotgan kinoteatrlarni davlat tiliga dublyaj qilingan xorijiy filmlar bilan ta’minlash tizimi joriy etilmagan.
Majlis davomida qayd etilgan muammolarni bartaraf etish yuzasidan hukumat vakillari hamda vazirlik-idoralar mas’ullariga tegishli vazifalar belgilab berilgan. Majlis so‘ngida qo‘mitaning tegishli qarori qabul qilingan.
Eslatib o‘tamiz, mart oxirlarida Senat qo‘mitasida Ozodbek Nazarbekov rahbarlik qilayotgan vazirlik tanqid qilingandi.
Mavzuga doir:
Izoh (0)