Qashqadaryoda noma’lum kasalikka chalinib, isitmasi chiqayotgani aytilgan to‘rt yoshli bolaning ahvoli yaxshilandi. Bu haqda “Daryo”ga uning yaqinlari xabar berdi.
Ma’lum bo‘lishicha, avvalroq olti yoshli opasi vafot etgan bola tog‘asi ko‘magida Qarshi shahridagi Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi Qashqadaryo filialiga olib borilgan.
“Uch nafar jiyanimni o‘zimning shaxsiy avtomobilimda shifoxonaga olib keldim. Ular tibbiy ko‘rikdan o‘tkazilmoqda. Issig‘i chiqayotgan jiyanimga tibbiy yordam ko‘rsatildi. Hozirda uning ahvoli ancha yaxshi. Shifokorlarga rahmat”, — deydi bolaning tog‘asi Feruz Abilov.
“Daryo” muxbiri bilan telefon orqali muloqotga kirishgan shifokor, Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi Qashqadaryo filiali mas’uli Hamza Ernazarov bolalar shifokorlar nazoratida ekanini, ularni tibbiy ko‘rikdan o‘tkazish davom etayotganini bildirdi.
“Ayni paytda bolalarning ahvoli yaxshi. Isitmalayotgan bolaga yordam ko‘rsatildi. U shifokorlar nazoratida. Tashvishga hojat yo‘q”, — deydi shifokor Hamza Ernazarov.
“Daryo” voqealar rivojini kuzatishda davom etadi.
Izoh (0)