Ijtimoiy tarmoqlarda Namangan viloyati Pop tumani yo‘lida Damas’lar olib ketayotgan yuk mashinasi YTHga uchragani tasvirlangan suratlar tarqaldi. Viloyat YXHB mazkur holat yuzasidan ma’lumot berdi.
Ma’lum qilinishicha, 4R-112 Farg‘ona halqa yo‘li avtomobil yo‘lining 25-kilometrida harakatlanib ketayotgan yuk avtomashina haydovchisi uxlab qolishi oqibatida svetoforning qizil chirog‘ida to‘xtab turgan treylerning orqasiga urilgan.
Hodisa oqibatida yuk avtomashina haydovchisi bosh miya jarohati bilan Pop tuman shifoxonasiga yotqizilgan. Treylerga ortilgan 9 ta Damas texnik shikastlangan. Holat yuzasidan qo‘shimcha surishtiruv ishlari olib borilmoqda.
Eslatib o‘tamiz, 2020-yilning oktabrida Nexia va Cobalt avtomobillari ortilgan treyler yo‘l-transport hodisasiga uchragan, 2022-yilning may boshlarida esa Farg‘onada Damas’lar ortilgan MAN yuk mashinasiga boshqa MAN kelib urilgan edi.
Izoh (0)