Бухорода спиртли ичимлик истеъмол қилган ота турмуш ўртоғи билан ўртасида чиққан жанжал оқибатида 1 ёшли фарзандини деворга отиб юбориб, унга оғир тан жароҳати етказди. У ҳолатнинг олдини олишга етиб келган ИИБ ходимларига ҳам фаол қаршилик кўрсатган. Фуқарога жиноят иши қўзғатилди, дея «Дарё»га хабар берди вилоят прокуратураси ахборот хизмати раҳбари.
Таъкидланишича, жорий йилнинг 23 июнь куни, соат 20:30 ларда Жондор туманида яшовчи У.Р. маст ҳолатда ўз хонадонига кириб келган. Турмуш ўртоғи А.Н. билан сабабсиз жанжал кўтарган ва уни калтаклаб, тана аъзоларининг турли қисмларига жароҳат етказган. Айни шу пайтда қўрқувдан чинқириб йиғлаб юборган бир ёшли боласи З.Р.ни зарб билан деворга отиб юбориб, оғир тан жароҳати етказган.
У.Р.нинг отаси фуқаро Ў.Р. ўғлини шафқатсиз хатти-ҳаракатлардан тўхтатишга уринган, аммо унга кучи етмаган учун тезкорлик билан ички ишлар бўлимига хабар берган.
Ҳодиса жойига ички ишлар ходимлари етиб келган. Лекин У.Р. ҳуқуқ посбонларининг қонуний талабларига бўйсунмасдан, уларни омма олдида обрўйсизлантириш мақсадида ҳақорат қилган. Хизмат вазифасини бажараётган ИИБ ходими Ш.Ш.нинг кўзига уриб, унга ҳам тан жароҳати етказган. Шунингдек, ИИБ ходими Б.А.нинг хизмат кийими ва погонларини юлиб, уларга фаол қаршилик кўрсатган.
У.Р.нинг жиноий ҳаракатлари тўхтатилиб, бошқа жиноятларни содир этишга қаратилган ҳаракатларининг олди олинган.
Ички ишлар ходимлари ва шифокорларнинг ўз вақтида кўрсатган саъй-ҳаракатлари туфайли З.Р.нинг ҳаёти сақлаб қолинган.
Суд-тиббий экспертизанинг маълумотига кўра, З.Р. бош мия ёпиқ жароҳати, бош мия чайқалиши, пешона соҳаси юмшоқ тўқимаси лат ейиши ва тери кўкариши каби тан жароҳатлари олгани аниқланган.
Мазкур ҳолат юзасидан Жондор туман прокуратураси томонидан фуқаро У.Р.га нисбатан Жиноят кодексининг тегишли моддалари билан жиноят иши қўзғатилган.
Ҳозирда дастлабки тергов ҳаракатлари олиб борилмоқда.
Изоҳ (0)