Туркманистонда истеъфодаги аскарларни демобилизация (уйга қайтариш) қилиш ишлари давом этмоқда.
Ҳарбий қисмни тарк этишдан олдин аскарлар ҳарбий кийимларини, жумладан, ички кийимларини қайтариб бериши, кийим-кечак ва ҳожатхона воситаларидан фойдаланганлик учун 270 манат (840 минг сўм) тўлаши керак, дея хабар бермоқда «Хроника Туркманистана» мухбирлари.
Ушбу пул расмий равишда ҳарбий хизматни ўташ пайтида ҳисобланган пул нафақасидан ушлаб қолинади, ушбу нафақа бажарилган иш ва унвонига қараб ойига 90 дан 100 манатгача тўланади. Қолган пуллар уларнинг банк ҳисоб рақамига ўтказилади. Агар у йўқ бўлса, унда ота-оналарнинг ҳисобига ўтказиб берилади.
Дашогуз (Тошҳовуз) вилоятидаги ҳарбий қисмда хизмат қилган йигитнинг сўзларига кўра, уйга жўнатишдан бир ҳафта олдин аскарлар офицер ҳамроҳлигида бозордан фуқаролик кийимларини сотиб олган. Улар, шунингдек, норасмий «анъанага кўра», навбатчи ва қўриқчи назорат пунктларига камида 200 манат (622 минг сўм) совға қолдиришлари керак.
Ҳарбий қисм командирига бериладиган 1000 манат (уч миллион бир юз ўн икки минг сўм) пора эвазига ота-оналар ўғлини «Ҳарбий хизматга чақириш ва резервга ўтказиш тўғрисида»ги фармон оммавий ахборот воситаларида эълон қилинган куннинг эртасигаёқ олиб кетиши мумкин. Акс ҳолда, аскар ҳарбий қисмда яна бир ярим — икки ой сақлаб турилиши мумкин.
Ўғлининг армиядан қайтиши шарафига кўплаб оилалар катта байрамлар уюштиради, кўплаб меҳмонларни таклиф қилади ва қўшиқчи, мусиқачилар билан кечки овқатлар уюштиради. Уларнинг хизматлари ўртача 1400 манатни (тўрт миллион уч юз эллик етти минг сўм) ташкил қилади.
Маҳаллий ҳокимият идоралари COVID-19 га қўйилган барча чекловлар ҳалигача олиб ташланмагани сабаб, байрамни кўчада ёки кафеда эмас, балки уйда ёки ҳовлида ўтказишни тавсия қилмоқда.
Туркманистон армиясидаги ҳарбий хизмат муддати икки йил.
Изоҳ (0)