Ijtimoiy tarmoqlarda Energetika vazirligi elektr energetikasi tarmog‘ini isloh qilish loyihasi direktori o‘rinbosari Bahrombek Umarbekovning soha o‘zbekistonliklar aylanma mablag‘iga muhtoj emasligi haqidagi gaplari muhokamalarga sabab bo‘lgandi. “Mahalla” telekanalida efirga uzatilgan ko‘rsatuvda Umarbekov: “O‘zbekistonda hech kim, manaman degan Ortiqxo‘jayevingiz ham, manavi Murod Buildings va boshqalar 6 foizga o‘lib qolsa ham aylanma mablag‘ qo‘ymaydi. 15 foizga qo‘yadi. Arablar esa 6 foizdan, Jahon banki 3 foizdan pul beryapti. Biz o‘zbeklarning puliga muhtoj emasmiz, pul more”, – degan edi. Bugun, 23-iyun kuni Toshkent shahrida o‘tkazilgan energetika forumi doirasida Bahrombek Umarbekov jurnalistlar bilan suhbatda bo‘lib, ko‘rsatuvdagi fikrlarini izohladi, deya xabar bermoqda “Daryo” muxbiri.
Bahrombek Umarbekov fikrlari haqiqat ekani, energetika va iqtisodiyot rivojlanishi uchun past foizli tariflar kerakligini aytdi.
“Mahalliy kapital egalari o‘z kapitalidan xorijiy investorlarga nisbatan kattaroq daromad talab qiladi. Xorijiy mamlakatlarda kapital ko‘p bo‘lgani uchun u yerdagi investorlar kamroq daromadga ham rozi. Masalan, arab davlatlarini olib qaraylik. Mamlakatda pul juda ko‘p va investitsiya imkoniyati cheklangan. Shuning uchun ular kapitaliga topayotgan daromadi past. Bunday loyihalarga pul tiksa, ular 6-8 foizga ham rozi bo‘ladi. Bizning O‘zbekistonda investitsiya imkoniyatlari juda ko‘p. Lekin kapital kam. Shu bois, ular o‘z kapitallariga yuqori daromadlilikni talab qilyapti. Energetikaga nega chet el kapitali kerak? Sababi ular uzoq muddatga pul tikishga tayyor. Ular talab qilayotgan tarif pastligi uchun, biz past tarif olyapmiz. Past tarif iqtisodiyotimizning o‘sishi uchun juda muhim. Chunki qancha energiya resurlarining narxlari raqobat asosida arzon tursa, shuncha qolgan sohalar yaxshi rivojlanib keta oladi. Biz tezroq boy bo‘lishimiz va rivojlanishimiz kerak. Shuning uchun bu muhim”, – dedi Bahrombek Umarbekov.
Avvalroq O‘zbekistonda elektr va gaz narxlari ijtimoiy norma asosida oshirilayotgani, hukumat bu bo‘yicha yangi qaror loyihasini e’lon qilgani bildrilgandi.
Izoh (0)