O‘zbekiston fuqarolari yaqin qarindoshlari vafot etgan yoki ular dafn etilgan joylarni ziyorat qilganda xorijga chiqish biometrik pasporti berilgani uchun davlat bojini to‘lashdan ozod qilinadi. Bu haqda 22-iyun kuni AOKAda bo‘lib o‘tgan matbuot anjumanida ma’lum qilindi.
Ta’kidlanishicha, fuqarolar “Davlat boji to‘g‘risida”gi qonunga muvofiq, quyidagi hollarda xorijga chiqish biometrik pasporti berilgani uchun davlat bojini to‘lashdan ozod qilinadi:
- yaqin qarindoshlari vafot etgan yoki ular dafn etilgan joylarni ziyorat qilganda;
- fuqarolik, oilaviy va jinoyat ishlari bo‘yicha huquqiy yordam ko‘rsatish to‘g‘risidagi shartnomalarga (bitimlarga) binoan ular xorij sudlariga fuqarolik va jinoyat ishlari yuzasidan taraflar, guvohlar va ekspertlar sifatida chaqirilgan taqdirda;
- voyaga yetmagan shaxsga, shuningdek, unga hamrohlik qiluvchi shaxsga xorijiy davlatda ixtisoslashgan tibbiy yordam ko‘rsatilganda yoki jarrohlik amaliyoti o‘tkazilganda;
- voyaga yetmagan shaxs ilm-fan, ta’lim, sport yoki madaniyat sohalaridan biridagi xalqaro tadbirda yoki musobaqada ishtirok etganda;
- “Ijtimoiy himoya yagona reyestri”ga kiritilgan shaxsga, shuningdek, unga hamrohlik qiluvchi shaxsga xorijiy davlatda ixtisoslashgan tibbiy yordam ko‘rsatilganda yoki jarrohlik amaliyoti o‘tkazilganda;
- biometrik pasport O‘zbekiston Respublikasi yoki chet davlatlar hududida tabiiy va texnogen xususiyatli favqulodda vaziyatlar, shu jumladan, maishiy tusdagi ofatlar (turar joylarning yoki yashash uchun mo‘ljallanmagan joylarning yonishi, qulashi, transport vositalarining yonishi) yuz berganligi natijasida jabrlangan jismoniy shaxslar tomonidan yo‘qotilgan yoxud yaroqsiz holga kelganda.
Izoh (0)