17—18-iyun kunlari Qozog‘istonning Turkiston shahriga jurnalist va blogerlar uchun Turizm vazirligi tomonidan infotur tashkil etildi. “Daryo” muxbiri Turkiston viloyatida bo‘lib, shaharning diqqatga sazovor joylaridan fotoreportaj tayyorladi.
Turistik shaharchaga aylantirilgan Karvon saroy majmuasi obyektlari 20 gektardan oshiq bo‘lib, tarix va zamonaviylikni mujassamlashtira olgan. Shuningdek, bu yerga kelgan odamning e’tiborini suv havzasi tortishi tabiiy. Bir qarashda Italiyaning Venetsiya shahriga ham o‘xshab ketadi.
Turkiston shahrida joylashgan Xo‘ja Ahmad Yassaviy me’moriy majmuasi. Yodgorlik Amir Temur buyrug‘iga asosan 1385–1405-yillarda qurilgan bo‘lib, bu yerga hozirda ziyorat uchun yiliga 1 milliondan ortiq xorijdan turistlar va mahalliy aholi tashrif buyuradi.
Turkistondan 50 km naridagi Sauran shaharchasi. Tarixda Oq O‘rdaning poytaxti bo‘lgan. XIII-XV asrlarda shahar rivojlanib, odamlar faol hayot kechirgan. Hozir esa obyekt davlat himoyasiga olingan va muzeyga aylantirilgan.
Keyingi manzil “Oltin Semurg‘” uchar kinoteatri va “Uli Dala Eli” muzeyi. Kinoteatrda qozoq madaniyatining kelib chiqishi haqidagi filmni zamonaviy 8D formatda tomosha qilish mumkin. Muzeyda esa Qozog‘iston tarixiga oid eksponatlar saqlanadi. Ushbu eksponatlar ilmiy asoslangan materiallar, haqiqiy arxeologik topilmalar asosida qayta tiklangan.
Turkiy dunyo zalida 2 000 kvadrat metr maydonga ega ko‘p funksiyali ekran mavjud va unda turkiy xalqalar tarixi hamda ularning insoniyat sivilizatsiyasi taraqqiyotidagi o‘rni haqidagi film namoyish etiladi.
Suv ustida tungi Karvon saroy majmuasi bo‘ylab qayiqlarda sayr qilish imkoniyati mavjud. Bundan tashqari, musiqali favvoralar shousi hamda tarixiy qahramonlar obrazidagi teatrlashtirilgan paradlar ham bo‘lib o‘tadi.
Izoh (0)