Ижтимоий тармоқларда Энергетика вазирлиги электр энергетикаси тармоғини ислоҳ қилиш лойиҳаси директори ўринбосари Баҳромбек Умарбековнинг соҳа ўзбекистонликлар айланма маблағига муҳтож эмаслиги ҳақидаги гаплари муҳокамаларга сабаб бўлганди. «Маҳалла» телеканалида эфирга узатилган кўрсатувда Умарбеков: «Ўзбекистонда ҳеч ким, манаман деган Ортиқхўжаевингиз ҳам, манави Мурод Buildingс ва бошқалар 6 фоизга ўлиб қолса ҳам айланма маблағ қўймайди. 15 фоизга қўяди. Араблар эса 6 фоиздан, Жаҳон банки 3 фоиздан пул беряпти. Биз ўзбекларнинг пулига муҳтож эмасмиз, пул море», – деган эди. Бугун, 23 июнь куни Тошкент шаҳрида ўтказилган энергетика форуми доирасида Баҳромбек Умарбеков журналистлар билан суҳбатда бўлиб, кўрсатувдаги фикрларини изоҳлади, дея хабар бермоқда «Дарё» мухбири.
Баҳромбек Умарбеков фикрлари ҳақиқат экани, энергетика ва иқтисодиёт ривожланиши учун паст фоизли тарифлар кераклигини айтди.
«Маҳаллий капитал эгалари ўз капиталидан хорижий инвесторларга нисбатан каттароқ даромад талаб қилади. Хорижий мамлакатларда капитал кўп бўлгани учун у ердаги инвесторлар камроқ даромадга ҳам рози. Масалан, араб давлатларини олиб қарайлик. Мамлакатда пул жуда кўп ва инвестиция имконияти чекланган. Шунинг учун улар капиталига топаётган даромади паст. Бундай лойиҳаларга пул тикса, улар 6-8 фоизга ҳам рози бўлади. Бизнинг Ўзбекистонда инвестиция имкониятлари жуда кўп. Лекин капитал кам. Шу боис, улар ўз капиталларига юқори даромадлиликни талаб қиляпти. Энергетикага нега чет эл капитали керак? Сабаби улар узоқ муддатга пул тикишга тайёр. Улар талаб қилаётган тариф пастлиги учун, биз паст тариф оляпмиз. Паст тариф иқтисодиётимизнинг ўсиши учун жуда муҳим. Чунки қанча энергия ресурларининг нархлари рақобат асосида арзон турса, шунча қолган соҳалар яхши ривожланиб кета олади. Биз тезроқ бой бўлишимиз ва ривожланишимиз керак. Шунинг учун бу муҳим», – деди Баҳромбек Умарбеков.
Аввалроқ Ўзбекистонда электр ва газ нархлари ижтимоий норма асосида оширилаётгани, ҳукумат бу бўйича янги қарор лойиҳасини эълон қилгани билдрилганди.
Изоҳ (0)