Davlat soliq qo‘mitasi 2019—2022-yillarda qurilish sohasining asosiy ko‘rsatkichlari va ularning dinamikasi, ushbu davr uchun o‘tkazilgan tahlillar hamda nazorat tadbirlarida aniqlangan huquqbuzarliklar va ko‘p uchraydigan soliqdan qochish sxemalari haqida ma’lumot berdi.
Xususan, 2019—2022-yillarda tovar aylanma va bajarilgan ishlar hajmi o‘rtacha yildan yilga 15-20 foizga ortib borayotgan bo‘lsa-da, soha bo‘yicha o‘rtacha xarajatlar rentabelligi 2021-yildagi 10 foizdan 2022-yilda 3,1 foizga tushgani, qurilish sohasida faoliyat yuritayotgan 20 303 ta korxonaning 5 mingga yaqinida (24 foizi) hujjatlariga muvofiq, rentabellik 0 foizdan past, 12 mingdan ortig‘ida (60 foizi) 0 foizdan 1 foizgacha va 904 (4 foizi) kompaniyada 1 foizdan 3 foizgacha rentabellik qayd etilgan.
Bundan tashqari, 10 mingga yaqin (50 foiz) qurilish korxonalarida 1 nafar ishchi rasmiylashtirilgan bo‘lib, haqiqatan ishlaydigan ishchilar soni yashirilayotganidan dalolat beradi.
Shuningdek, quyidagi:
- turar joy obyektlarini o‘rtacha bozor narxidan keskin darajada past narxda realizatsiya qilish (misol uchun, qurilish korxonalarining biri tomonidan Uchtepa tumanida qurilgan yangi ko‘pqavatli turar joy majmuasidan 26 ta kvartira o‘rtacha 1,8 million so‘mdan sotilgan);
- hisobotlarda xarajatlarni sun’iy ravishda oshirib ko‘rsatish orqali faoliyatini zarar bilan yakunlash natijasida foyda solig‘ini to‘lamaslik (misol uchun, soliq to‘lovchi tomonidan 2022-yil 1-chorakda 16 milliard so‘m realizatsiya amalga oshirilgan bo‘lsa-da, faoliyat 8 milliard so‘m zarar bilan yakunlangan);
- jismoniy shaxslar tomonidan qurilish korxonalari ustav jamg‘armasiga yirik miqdorda pul mablag‘lari, bino va inshootlar, qurilish mollari (manbasi ko‘rsatilmagan holda) kiritish va realizatsiya qilinishi (misol uchun, 2 ta ta’sischi jismoniy shaxslar tomonidan ustav kapitali 2021-yil boshidan bugungi kunga qadar 121 milliard so‘mga to‘ldirilgan. Ta’sischilarning soliq organlaridagi ma’lumotlariga asosan yillik rasmiy daromadi 3,4 million so‘mni tashkil etgani aniqlangan);
- bajarilgan ishlar hajmini EHF rasmiylashtirmaslik orqali yashirish holatlari (misol uchun, soliq to‘lovchining hisob raqamiga bajarilgan ishlar uchun 78 milliard so‘m mablag‘lar kelib tushgan bo‘lsa-da, soliq hisobotlarida 15 milliard so‘m aylanma aks ettirilgan).
Izoh (0)