Konstitutsiyani isloh qilish bo‘yicha tuzilgan maxsus komissiya bir oydan kamroq muddat ichida “O‘zbekiston konstitutsiyasiga o‘zgartirish va qo‘shimchalar kiritish to‘g‘risida”gi konstitutsiyaviy qonun loyihasi tayyorlandi. Bu haqda 22-iyun kuni bo‘lib o‘tgan Qonunchilik palatasining Korrupsiyaga qarshi kurashish va sud-huquq masalalari hamda Demokratik institutlar, nodavlat tashkilotlar va fuqarolarning o‘zini o‘zi boshqarish organlari qo‘mitalarining qo‘shma yig‘ilishi yakunida o‘tkazilgan brifingda ma’lum qilindi.
“Amaldagi konstitutsiyaning 83-moddasiga muvofiq, loyiha deputatlar tomonidan qonunchilik tashabbusi huquqi asosida quyi palataga kiritilgan. Qonun konstitutsiyaning 66 ta moddasiga 170 dan ortiq tuzatishlar kiritishni nazarda tutmoqda”, — deydi deputat Jahongir Shirinov.
Uning ta’kidlanishicha, konstitutsiyaga kiritilayotgan o‘zgartirishlar “inson-jamiyat-davlat” prinsipiga asoslangan bo‘lib, milliy konstitutsiyaviy o‘zlikni aks ettiradi va amaldagi konstitutsiyaning barcha bo‘limlariga tub o‘zgartirishlar kiritishni nazarda tutadi.
Qo‘mitalarning qo‘shma yig‘ilishida konstitutsiyaviy qonun loyihasini ko‘rib chiqish uchun kiritishga ijobiy xulosa berildi. Qayd etilishicha, loyihaga quyi palata kengashi ham palatada ko‘rib chiqish mumkinligi to‘g‘risida qaror qabul qilgan.
Loyiha endi partiyalar fraksiyasi majlislarida muhokama qilinadi va yakunda Qonunchilik palatasining yalpi majlisiga birinchi o‘qishga kiritiladi.
“Yalpi majlisda konseptual jihatdan deputatlarimiz tomonidan ko‘rib chiqilganidan keyin qonun loyihasini umumxalq muhokamasiga chiqarish haqidagi takliflarimiz ham tayyorlanmoqda. Ya’ni deputatlar ma’qullagach Bosh qonunga o‘zgartirish va qo‘shimchalar kiritishni tasdiqlash maqsadida referendum o‘tkaziladi”, — deydi Jahongir Shirinov.
Oradan 6 kun o‘tib, 26-may kuni Komissiyaning birinchi yig‘ilishi o‘tkazilib, unda asosan tashkiliy masalalar ko‘rilib, takliflar bilan ishlash tartibi belgilab olingandi. Komissiya matbuot xizmati har haftada bir marotaba yig‘ilish o‘tkazilishi takliflar muhokama qilib borilishi aytilgandi.
Konstitutsiyaviy komissiya matbuot xizmati ma’lumotlariga ko‘ra, bugunga qadar komissiya atigi 5 marotaba (shundan bittasida tashkiliy masala ko‘rilgan) yig‘ilish o‘tkazgan — 26-may, 3-iyun, 10-iyun, 17-iyun. 18-iyunda Senat va Qonunchilik palatasining qo‘shma majlisi bo‘lib o‘tgan.
20-iyun kuni esa O‘zbekiston prezidenti Shavkat Mirziyoyev Konstitutsiyaviy komissiya a’zolari bilan uchrashib, o‘zining takliflarini bildirdi.
Mavzuga doir:
- Shavkat Mirziyoyev konstitutsiyaga “Miranda qoidasi”ni kiritishni taklif qildi
- Shavkat Mirziyoyev sudlangan shaxs qarindoshlarining huquqlarini cheklamaslikni konstitutsiyada belgilashni taklif qildi
- Shavkat Mirziyoyev: “Har bir O‘zbekiston fuqarosi turar yoki yashash joyini erkin tanlash huquqiga ega bo‘lishi shart”
- Shavkat Mirziyoyev: “Sud qarorisiz hech kim uy-joyidan mahrum qilinmasligi kerak”
Izoh (0)