Давлат солиқ қўмитаси 2019—2022 йилларда қурилиш соҳасининг асосий кўрсаткичлари ва уларнинг динамикаси, ушбу давр учун ўтказилган таҳлиллар ҳамда назорат тадбирларида аниқланган ҳуқуқбузарликлар ва кўп учрайдиган солиқдан қочиш схемалари ҳақида маълумот берди.
Хусусан, 2019—2022 йилларда товар айланма ва бажарилган ишлар ҳажми ўртача йилдан йилга 15-20 фоизга ортиб бораётган бўлса-да, соҳа бўйича ўртача харажатлар рентабеллиги 2021 йилдаги 10 фоиздан 2022 йилда 3,1 фоизга тушгани, қурилиш соҳасида фаолият юритаётган 20 303 та корхонанинг 5 мингга яқинида (24 фоизи) ҳужжатларига мувофиқ, рентабеллик 0 фоиздан паст, 12 мингдан ортиғида (60 фоизи) 0 фоиздан 1 фоизгача ва 904 (4 фоизи) компанияда 1 фоиздан 3 фоизгача рентабеллик қайд этилган.
Бундан ташқари, 10 мингга яқин (50 фоиз) қурилиш корхоналарида 1 нафар ишчи расмийлаштирилган бўлиб, ҳақиқатан ишлайдиган ишчилар сони яширилаётганидан далолат беради.
Шунингдек, қуйидаги:
- турар жой объектларини ўртача бозор нархидан кескин даражада паст нархда реализация қилиш (мисол учун, қурилиш корхоналарининг бири томонидан Учтепа туманида қурилган янги кўпқаватли турар жой мажмуасидан 26 та квартира ўртача 1,8 миллион сўмдан сотилган);
- ҳисоботларда харажатларни сунъий равишда ошириб кўрсатиш орқали фаолиятини зарар билан якунлаш натижасида фойда солиғини тўламаслик (мисол учун, солиқ тўловчи томонидан 2022 йил 1-чоракда 16 миллиард сўм реализация амалга оширилган бўлса-да, фаолият 8 миллиард сўм зарар билан якунланган);
- жисмоний шахслар томонидан қурилиш корхоналари устав жамғармасига йирик миқдорда пул маблағлари, бино ва иншоотлар, қурилиш моллари (манбаси кўрсатилмаган ҳолда) киритиш ва реализация қилиниши (мисол учун, 2 та таъсисчи жисмоний шахслар томонидан устав капитали 2021 йил бошидан бугунги кунга қадар 121 миллиард сўмга тўлдирилган. Таъсисчиларнинг солиқ органларидаги маълумотларига асосан йиллик расмий даромади 3,4 миллион сўмни ташкил этгани аниқланган);
- бажарилган ишлар ҳажмини ЭҲФ расмийлаштирмаслик орқали яшириш ҳолатлари (мисол учун, солиқ тўловчининг ҳисоб рақамига бажарилган ишлар учун 78 миллиард сўм маблағлар келиб тушган бўлса-да, солиқ ҳисоботларида 15 миллиард сўм айланма акс эттирилган).
Изоҳ (0)