Davlat xavfsizlik xizmatining Toshkent viloyati bo‘yicha boshqarmasi va boshqa mas’ul idoralar hamkorligida olib borilgan o‘rganishlar natijasida joylardagi madaniy meros obyektlariga nisbatan sovuqqonlik bilan munosabatda bo‘lish hamda davlat manfaatlariga juda ko‘p miqdorda zarar yetkazish holatlari aniqlandi. Bu haqda O‘zA xabar qildi.
Jumladan, Madaniyat vazirligi huzuridagi “Markazlashgan investitsiyalar hisobidan moliyalashtiriluvchi obyektlarni qurish, rekonstruksiya qilish, mukammal va joriy ta’mirlash bo‘yicha buyurtmachi xizmati” Davlat muassasasi hamda “Аntiqa va sifatli qurilish” xususiy korxonasi o‘rtasida 2020—2021-yillarda Bo‘stonliq tumanida joylashgan “Shayx Umar Vali Bog‘istoniy” ziyoratgohini ta’mirlash-tiklash ishlari bo‘yicha 1,7 milliard so‘mlik pudrat shartnomasi imzolangan. Lekin buyurtmachi xizmati Davlat muassasasi va korxona mansabdor shaxslari ta’mirlash ishlari bo‘yicha tuzilgan hisob-fakturalarga soxta ma’lumotlar kiritgan. Haqiqatan bajarilmagan ishlarni qo‘shib yozish orqali 402,7 million so‘mlik budjet mablag‘larini noqonuniy o‘zlashtirishgan.
Holat yuzasidan Jinoyat kodeksining 167 (o‘zlashtirish yoki rastrata yo‘li bilan talon-toroj qilish) va 209-moddalari (mansab soxtakorligi) bilan jinoyat ishi qo‘zg‘atilgan.
Vazirlar Mahkamasining 2018-yil 15-fevraldagi qaroriga asosan Toshkent viloyati Qibray tumanidagi “Qilichli ota” ziyoratgohida qayta ta’mirlash va tiklash ishlari bo‘yicha viloyat hokimligining “Yagona buyurtmachi xizmati” injiniring kompaniyasi va “Toshmelioqurilish” MCHJ o‘rtasida shartnoma tuzilib, 309 million 107 ming so‘m budjet mablag‘i ajratilgan.
Biroq “Yagona buyurtmachi xizmati” injiniring kompaniyasi va “Toshmelioqurilish” MCHJ mansabdor shaxslari o‘zaro til biriktirib, bajarilgan qurilish ishlari bo‘yicha tuzilgan hisob-fakturalarga soxta ma’lumotlar kiritgan. Haqiqatan bajarilmagan ish hajmlarini qo‘shib yozish orqali 263 million 286 ming so‘mlik budjet mablag‘larini noqonuniy o‘zlashtirishgan.
Holat yuzasidan injiniring kompaniyasi va MCHJ mansabdor shaxslariga nisbatan Jinoyat kodeksining 167 (o‘zlashtirish yoki rastrata yo‘li bilan talon-toroj qilish) va 228- (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.
Yana bir holatda esa Qibray tumanidagi “Buzgan tepa” arxeologiya yodgorligining yon qismlarida maishiy xizmat ko‘rsatish shoxobchalari va boshqa binolar qurish bo‘yicha ishlar olib borilgan. Oqibatda ushbu moddiy madaniy meros obyektiga 5 milliard 668 millon so‘mlik zarar yetkazilgan.
Holat yuzasidan Jinoyat kodeksining 132 (moddiy madaniy meros obyektlarini nobud qilish, buzish yoki ularga shikast yetkazish) va 205- moddalari (hokimiyat yoki mansab vakolatini suiiste’mol qilish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)