Surxondaryo viloyatida budjet mablag‘larining talon-toroj qilinishi, suiiste’molchilik va korrupsiya holatlariga barham berish hamda mansabdor shaxslarning mas’uliyatini yanada oshirishga qaratilgan yig‘ilishda 8 nafar davlat xizmatchisi DXX tomonidan qo‘lga olindi. Bu haqda O‘zA xabar qildi.
Qayd etilishicha, DXX Surxondaryo viloyati bo‘yicha boshqarmasi tomonidan budjet va kredit mablag‘larini o‘zlashtirgan 1 nafar sobiq bank xodimi va 7 nafar turli tashkilot xodimlari ehtiyot chorasi sifatida majlis jarayonida qamoqqa olingan.
May oyida “Surxondaryodonmahsulotlari” AJga qarashli “Alpomish” un tegirmoni sobiq rahbari D.A. va ombor mudiri F.A. qiymati 12 milliard 87 million so‘m bo‘lgan 2 ming 884 tonna don mahsulotini talon-toroj qilgani aniqlangan. Tergov harakatlari davomida D.A. o‘zi tomonidan talon-toroj qilingan 616 tonna don mahsuloti uchun yetkazilgan zararni, ya’ni 2 milliard 607 million so‘mni to‘liq qoplagani uchun unga nisbatan qo‘llangan qamoq ehtiyot chorasi garovga o‘zgartirilgan.
Shuningdek, mazkur jinoyat ishi doirasida “Muzrabot don qabul qilish shoxobchasi” sobiq mudiri O.I. “Alpomish” un tegirmoni sobiq rahbari Y.O.lar katta miqdordagi don mahsulotlarini talon-toroj qilgan. Ularga nisbatan ham qamoq ehtiyot chorasi qo‘llangan.
Bundan tashqari, un tegirmoni sobiq rahbari Y.O.ning qiymati 4 milliard 886 million so‘mlik 1 ming 166 tonna don mahsuloti talon-toroj qilingani aniqlangan. Tergov jarayonida sobiq rahbarga tegishli bo‘lgan qiymati 5 milliard 400 million so‘mlik ko‘chmas mulk obyektlari xatlovga olingan. Shu sababli unga nisbatan qo‘llangan qamoq ehtiyot chorasi ham garovga o‘zgartirildi.
Shuningdek, ombor mudiri F.A. hamda tegirmon katta tahlilchisi X.J. tomonidan jinoiy yo‘l bilan topilgan 2 ta Gentra yengil avtomashinasi ham tegishli tartibda xatlangan.
Yana bir holatda 2021-yilda Sho‘rchi tumanidagi Shurchi Indenim Klaster MCHJ tasarrufidagi 1376 gektar paxta maydoniga tomchilatib sug‘orish texnologiyasini joriy qilish rejalashtirilgan. Amalda texnologiya 142,7 gektar maydonda barpo etilib, pudratchi Agro new drip MCHJ tomonidan ishlar to‘liq yakuniga yetkazilmagan. Hisobotlarda esa ishlarning to‘liq bajarilgani ko‘rsatilgan. Bu esa katta miqdordagi subsidiya mablag‘larining ajratilishiga sabab bo‘lgan.
O‘rganishlar davomida “Amu-Surxon” irrigatsiya tizimlari havza boshqarmasi boshlig‘i T.A. va ushbu boshqarmada faoliyat yuritib kelayotgan ayrim mas’ul shaxslar davlat budjetidan subsidiya mablag‘lari ajratilishi haqidagi imkoniyatdan qasddan foydalanib, yuqoridagi 142,7 gektar maydondan tashqari, qo‘shimcha 993 gektarda tomchilatib sug‘orish texnologiyasi joriy etilgani haqida soxta hujjatlar tuzgan.
Oqibatda Shurchi Indenim Klaster MCHJga 6 milliard 747 million 640 ming so‘m miqdoridagi subsidiya mablag‘lari asossiz ajratilgan va iqtisodiyotga katta miqdorda zarar keltirilgan. Holat yuzasidan T.A.ga gumonlanuvchi sifatida qamoq ehtiyot chorasi qo‘llangan.
Hozirda esa Shurchi Indenim Klaster MCHJ mas’ul shaxslari tomonidan keltirilgan 6 milliard 747 million 640 ming so‘mlik zararning davlat foydasiga undirilishi ta’minlangan. Shu munosabat bilan unga nisbatan qo‘llangan qamoq ehtiyot chorasi garovga o‘zgartirilgan.
Tergov harakatlari davom ettirilmoqda.
Izoh (0)