Oliy Majlis Qonunchilik palatasining navbatdagi majlisida bir guruh deputatlar tomonidan ishlab chiqilgan — “Geografik obyektlarning nomlari to‘g‘risida”gi qonuniga qo‘shimchalar va o‘zgartish kiritish haqidagi qonun loyihasi birinchi o‘qishda konseptual jihatdan ko‘rib chiqildi. Bu haqda parlament quyi palatasi matbuot xizmati xabar berdi.
Qayd etilishicha, qonun loyihasida aholi punktlarining tarkibiy qismlariga (mahallalar, shohko‘chalar, ko‘chalar, maydonlar, bog‘lar, xiyobonlarga) O‘zbekiston va jahon tarixida chuqur iz qoldirgan shaxslarning ismi-sharifini berish mexanizmlarini tartibga solish ko‘zda tutilgan.
Shuningdek, loyiha bilan geografik obyektlarga nom berish va ularning nomlarini o‘zgartirish to‘g‘risidagi takliflarni tayyorlashda mazkur geografik obyekt joylashgan hududda yashovchi mahalliy aholining fikri hisobga olinishi belgilanmoqda.
Majlisda qonun loyihasini yanada takomillashtirish yuzasidan deputatlar tomonidan bir qator taklif va tavsiyalari bildirilib, birinchi o‘qishda qabul qilingan.
Eslatib o‘tamiz, 2020-yilda bosh vazir Abdulla Aripov qishloq va mahallalarning mantiqsiz nomlarini tanqid qilgandi. “Gap mahalliy hokimliklar, hududiy komissiyalarning ‘yetar, endi bu nomni o‘zgartiramiz’ deb, amaliy harakatni boshlashida qolgan. Joylarni nomlash nozik masala. Bunga jiddiy e’tibor qaratishimiz lozim. Bu sohada qonun hujjatlariga qat’iy rioya qilinishi lozim. Mahalliychilik, oshna-og‘aynigarchilik, xizmat martabasini suiiste’mol qilishga yo‘l qo‘ymaslik shart va zarur. Odamlarning ismlari bilan, shuningdek, tarixiy voqealar sharafiga nomlash va qayta nomlash sohasida belgilangan cheklovlarga rioya qilinishini ta’minlashimiz lozim bo‘ladi”, — degan edi Abdulla Aripov.
Izoh (0)