May oyida Buyuk Britaniyaning iste’mol narxlari indeksi (CPI) benzin va oziq-ovqat narxlarining keskin o‘sishi fonida o‘tgan yilning shu davriga nisbatan 9,1 foizgacha ko‘tarildi.
Milliy statistika xizmati (ONS) ma’lumotlariga ko‘ra, bu 1982-yil fevralidan beri eng yuqori inflyatsiya darajasi bo‘lib, bundan bir yil avval, 2021-yilning may oyida esa 2,1 foizni tashkil qilgan.
Inflyatsiyaning o‘sishiga benzin va dizel yonilg‘isi, oziq-ovqat va alkogolsiz ichimliklar narxlarining oshishi eng katta hissa qo‘shdi.
Shu bilan birga, ONS ma’lumotlariga ko‘ra, may oyida oziq-ovqat narxlari 2009-yildan beri eng tez sur’atlarda o‘sdi. Eng ko‘p iste’mol qilinadigan non, yorma va go‘sht qimmatlashgan. Kiyim-kechak, poyabzal, shuningdek, ko‘ngilochar va madaniy tadbirlar esa arzonlashgan.
Bir yil avval, 2021-yilning may oyida aynan teskari tendensiya kuzatilgandi: kiyim-kechak, poyabzal va dam olish narxlari eng ko‘p o‘sgan, oziq-ovqat va alkogolsiz ichimliklar esa arzonlashgan.
Uy-joy mulkdorlarining yillik inflyatsiya indeksi (CPIH) may oyida 7,9 foizga o‘sdi, bu 1991-yil aprelidan beri eng tez ko‘rsatkichdir.
CPIH’ning o‘sishiga eng katta hissani kommunal xizmatlar, transport narxlarining ko‘tarilishi qo‘shdi.
Elektr va gaz narxining oshishi hisobga olingan holda kommunal xizmatlar narxlarining o‘sishi 2006-yildan beri eng yuqori ko‘rsatkich bo‘ldi.
2022-yilning may oyida benzinning o‘rtacha narxi litri uchun 165,9 pensni, dizel yonilg‘isi uchun esa 179,7 pensni tashkil etdi, bu ikkalasi ham rekord darajadagi yuqori ko‘rsatkichdir. Yil davomida yonilg‘i narxi 32,8 foizga oshgan.
Avvalroq O‘zbekistonda oylik inflyatsiya 1,5 fozi ekanligi xabar berilgan edi.
Izoh (0)