Pandemiya va Ukrainadagi urush zarbalariga qaramay, O‘zbekiston iqtisodiyoti barqarorlikni namoyish etdi. Bu haqda Xalqaro valyuta jamg‘armasi (XVJ) xabar berdi.
Pandemiya 2020-yilda savdo, turizm va transportda keskin sekinlashuvga olib keldi. Shunga qaramay, real o‘sish 1,9 foizda ijobiy bo‘lib qoldi. Yil oxirida inflyatsiya 11 foizga tushdi.
2021-yilda 7,4 foizga iqtisodiy o‘sish kuzatildi. Global narxlar bosimiga qaramay, qat’iy pul-kredit siyosati inflyatsiyani 2021-yil oxirigacha 10 foizgacha kamaytirishga yordam berdi.
Savdo va pul o‘tkazmalarining tiklanishi bilan joriy hisob taqchilligi biroz oshib, YIMning 7 foizini tashkil etdi. Ijtimoiy yordam, investitsiyalar va siyosiy kreditlar ko‘rinishidagi davlatning iqtisodiy qo‘llab-quvvatlashi umumiy budjet taqchilligini 2 foiz punktga oshirib, YIMning 6,2 foizini tashkil etdi.
O‘zbekistonning Rossiya bilan yaqin iqtisodiy aloqalarini hisobga oladigan bo‘lsak, 2022-yilga bo‘lgan istiqbol Ukrainadagi urush oqibatlari va Rossiyaga qarshi sanksiyalarga bog‘liq bo‘ladi.
Rossiyadan pul o‘tkazmalari, savdo va moliyalashtirish sekinlashishi kutilmoqda, bu 2022-yilda o‘sishni 3-4 foizga qisqartiradi va joriy hisob taqchilligini 8,5 foizgacha oshiradi.
Global oziq-ovqat va xom ashyo narxlari yuqori bo‘lganligi sababli, inflyatsiya 10 foizdan ortiq darajada saqlanib qolishi kutilmoqda. Biroq noaniqlik yuqori.
XVJ davlat korxonalari tomonidan yuzaga kelishi mumkin bo‘lgan fiskal xavflarni bartaraf etish bilan birga, daromadlarni yig‘ish va xarajatlar samaradorligini oshirishni davom ettirish zarurligini ta’kidladi.
Shuningdek, moliyaviy barqarorlikni ta’minlash markaziy bankning nazorat va makroprudensial tizimini kuchaytirishni, shu bilan birga banklarni yaqindan kuzatib borishni tavsiya qildi.
Avvalroq asosiy stavkani 16 foizgacha pasaygani nimani anglatishi va endi O‘zbekistonda nima o‘zgarishi haqida xabar berilgan edi.
Izoh (0)