Afg‘onistonda yuz bergan zilzila oqibatida qariyb 1,5 ming kishi halok bo‘lib, 2 ming kishi jabrlandi. Bu haqda Al Jazeera telekanali “Tolibon” harakati vakiliga tayanib xabar berdi. Avvalroq “Boxtar” agentligi 1 ming nafar qurbonlar va 1,5 ming jabrlanganlar haqida ma’lum qilgandi.
Zilzila 22-iyun kuni tunda Paktika, Xost, Lag‘mon, G‘azni, Luvgar va Kobul viloyatlarida kuzatildi. Mahalliy hukumat yer osti silkinishlari magnitudasini 6,1 deb baholadi. AQSH Geologiya xizmati ma’lumotlariga ko‘ra, 5,9 va 4,5 magnitudali kamida ikkita zilzila yuz bergan. Germaniya Geologiya tadqiqot markazi esa zilzila 10 kilometr chuqurlikda yuzaga kelganini aytmoqda.
Yevropa O‘rta Yer dengizi seysmologiya markazi ma’lumotlariga ko‘ra, zilzila Afg‘oniston, Pokiston va Hindistonning 500 kilometrdan ko‘proq qismida sezilgan.
Afg‘onistonda yuz bergan zilzila kuchi O‘zbekistonda ham sezildi. FVV Seysmoprognostik monitoring Respublika markazi xabariga ko‘ra, Zilzila Surxondaryo viloyatida ko‘proq sezildi — 3 ball. Qashqadaryo, Samarqand va Jizzax viloyatlarida 2 balldan sezildi.
Zilzila bor-yo‘g‘i bir necha daqiqa davom etdi, ammo juda katta vayronagarchiliklarni keltirib chiqardi. Bir nechta qishloqlar butunlay buzilib ketgan, vayronalar ostida haligacha odamlar qolmoqda. Eng ko‘p zarar ko‘rgan viloyatlar Paktika, Nangarhor va Xost bo‘ldi. Xost viloyatining o‘zida 600 ta uy qulab tushgan.
Mutaxassislar fikricha, qurbonlar sonining katta bo‘lishiga zilzila erta tongda yuz bergani sabab bo‘lgan bo‘lishi mumkin. Odamlar hali uyquda bo‘lgan va uylarini tark etishga ulgurmagan.
“Tolibon” hukumati jabrlanganlarga 1 milliard afg‘oni (qariyb 11 million dollar) ajratishga va’da berdi. Favqulodda vaziyatlar vaziri o‘rinbosari mulla Sharafiddin Muslim halok bo‘lganlarning oilalariga hukumat tomonidan 100 ming afg‘oni (1,1 ming dollar)dan, jabrlanganlar esa 50 ming afg‘oni (550 dollar)dan berilishini ma’lum qildi.
Afg‘oniston amiri va “Tolibon” rahbari Haybatullo Oxunzoda xalqaro hamjamiyatdan, shuningdek, xayriya va gumanitar tashkilotlardan “ushbu fojia munosabati bilan Afg‘oniston aholisiga yordam berish”ni so‘radi.
Izoh (0)