Афғонистонда юз берган зилзила оқибатида қарийб 1,5 минг киши ҳалок бўлиб, 2 минг киши жабрланди. Бу ҳақда Al Jazeera телеканали «Толибон» ҳаракати вакилига таяниб хабар берди. Аввалроқ «Бохтар» агентлиги 1 минг нафар қурбонлар ва 1,5 минг жабрланганлар ҳақида маълум қилганди.
Зилзила 22 июнь куни тунда Пактика, Хост, Лағмон, Ғазни, Лувгар ва Кобул вилоятларида кузатилди. Маҳаллий ҳукумат ер ости силкинишлари магнитудасини 6,1 деб баҳолади. АҚШ Геология хизмати маълумотларига кўра, 5,9 ва 4,5 магнитудали камида иккита зилзила юз берган. Германия Геология тадқиқот маркази эса зилзила 10 километр чуқурликда юзага келганини айтмоқда.
Европа Ўрта Ер денгизи сейсмология маркази маълумотларига кўра, зилзила Афғонистон, Покистон ва Ҳиндистоннинг 500 километрдан кўпроқ қисмида сезилган.
Афғонистонда юз берган зилзила кучи Ўзбекистонда ҳам сезилди. ФВВ Сейсмопрогностик мониторинг Республика маркази хабарига кўра, Зилзила Сурхондарё вилоятида кўпроқ сезилди — 3 балл. Қашқадарё, Самарқанд ва Жиззах вилоятларида 2 баллдан сезилди.
Зилзила бор-йўғи бир неча дақиқа давом этди, аммо жуда катта вайронагарчиликларни келтириб чиқарди. Бир нечта қишлоқлар бутунлай бузилиб кетган, вайроналар остида ҳалигача одамлар қолмоқда. Энг кўп зарар кўрган вилоятлар Пактика, Нангарҳор ва Хост бўлди. Хост вилоятининг ўзида 600 та уй қулаб тушган.
Мутахассислар фикрича, қурбонлар сонининг катта бўлишига зилзила эрта тонгда юз бергани сабаб бўлган бўлиши мумкин. Одамлар ҳали уйқуда бўлган ва уйларини тарк этишга улгурмаган.
«Толибон» ҳукумати жабрланганларга 1 миллиард афғони (қарийб 11 миллион доллар) ажратишга ваъда берди. Фавқулодда вазиятлар вазири ўринбосари мулла Шарафиддин Муслим ҳалок бўлганларнинг оилаларига ҳукумат томонидан 100 минг афғони (1,1 минг доллар)дан, жабрланганлар эса 50 минг афғони (550 доллар)дан берилишини маълум қилди.
Афғонистон амири ва «Толибон» раҳбари Ҳайбатулло Охунзода халқаро ҳамжамиятдан, шунингдек, хайрия ва гуманитар ташкилотлардан «ушбу фожиа муносабати билан Афғонистон аҳолисига ёрдам бериш»ни сўради.
Изоҳ (0)