Toshkentga Dushanbedan 30 yil ichidagi birinchi yo‘lovchi poyezdi yetib keldi (video)

20-iyundan boshlab 1990-yillar boshida to‘xtatib qo‘yilgan Dushanbe—Toshkent yo‘nalishi bo‘yicha yo‘lovchi poyezdlari harakati qayta tiklanishi to‘g‘risida xabar berilgandi. “O‘zbekiston temir yo‘llari”ning ma’lum qilishicha, 21-iyun kuni Dushanbe shahridan 30 yil ichida birinchi marta yo‘lga chiqqan yo‘lovchi poyezdi yetib keldi.

Toshkent—Dushanbe yo‘nalishida yo‘lovchi poyezdining qatnovi yo‘lga qo‘yilishi haqida prezident Shavkat Mirziyoyev Tojikiston yetakchisi Emomali Rahmonning O‘zbekistonga rasmiy tashrifi doirasida ma’lum qilgan edi.

Mazkur poyezd Dushanbedan haftaning dushanba kunlari jo‘nab, Toshkentga seshanba kunlari yetib keladi. Toshkentdan haftaning har seshanba kuni jo‘nab ketib, Dushanbega chorshanba kuni yetib boradi.

Ma’lumot uchun, xalqaro yo‘lovchi poyezdi Dushanbe—Quduqli—Sariosiyo—Qumqo‘rg‘on—Darband—Dehqonobod—Qarshi—Samarqand—Jizzax—Guliston—Toshkent yo‘nalishi bo‘yicha haftasiga bir marta harakatni amalga oshiradi. Dushanbedan Toshkentgacha bo‘lgan masofa 916 kilometrni tashkil etadi, harakat davomiyligi — 21 soat. Poyezdlar tarkibi tojikistonlik temiryo‘lchilar tomonidan shakllantiriladi. Taxminlarga ko‘ra, poyezd 10 ta vagondan iborat bo‘ladi: 1 ta yotoq vagoni, 4 ta kupe, vagon-restoran va 4 ta plaskart vagon.