20 июндан бошлаб 1990 йиллар бошида тўхтатиб қўйилган Душанбе—Тошкент йўналиши бўйича йўловчи поездлари ҳаракати қайта тикланиши тўғрисида хабар берилганди. «Ўзбекистон темир йўллари»нинг маълум қилишича, 21 июнь куни Душанбе шаҳридан 30 йил ичида биринчи марта йўлга чиққан йўловчи поезди етиб келди.
Тошкент—Душанбе йўналишида йўловчи поездининг қатнови йўлга қўйилиши ҳақида президент Шавкат Мирзиёев Тожикистон етакчиси Эмомали Раҳмоннинг Ўзбекистонга расмий ташрифи доирасида маълум қилган эди.
Мазкур поезд Душанбедан ҳафтанинг душанба кунлари жўнаб, Тошкентга сешанба кунлари етиб келади. Тошкентдан ҳафтанинг ҳар сешанба куни жўнаб кетиб, Душанбега чоршанба куни етиб боради.
Маълумот учун, халқаро йўловчи поезди Душанбе—Қудуқли—Сариосиё—Қумқўрғон—Дарбанд—Деҳқонобод—Қарши—Самарқанд—Жиззах—Гулистон—Тошкент йўналиши бўйича ҳафтасига бир марта ҳаракатни амалга оширади. Душанбедан Тошкентгача бўлган масофа 916 километрни ташкил этади, ҳаракат давомийлиги — 21 соат. Поездлар таркиби тожикистонлик темир йўлчилар томонидан шакллантирилади. Тахминларга кўра, поезд 10 та вагондан иборат бўлади: 1 та ётоқ вагони, 4 та купе, вагон-ресторан ва 4 та пласкарт вагон.
Эслатиб ўтамиз, 2021 йилнинг октябрида Тошкент—Хўжанд—Тошкент халқаро автобус йўналишида мунтазам қатновлар қайта тикланганди. 2022 йилнинг апрелида эса Ўзбекистон ва Тожикистон ўртасидаги қатор автобус қатновлари тажриба-синов тариқасида тикланган.
Изоҳ (0)