Toshkentda Ozarbayjon prezidentining O‘zbekistonga tashrifi arafasida Investitsiyalar va tashqi savdo vazirligi va Savdo-sanoat palatasi tomonidan Ozarbayjon Iqtisodiyot vazirligi hamda Eksport va investitsiyalarni rag‘batlantirish agentligi bilan hamkorlikda tashkil qilingan O‘zbekiston-Ozarbayjon biznes-forumi bo‘lib o‘tdi.
Investitsiyalar va tashqi savdo vazirligi matbuot xizmatining xabar berishicha, tadbirda vazirlik va idoralar, tarmoq birlashmalari rahbarlari hamda Ozarbayjon va O‘zbekistonning yirik kompaniyalarining 100 dan ortiq vakillari ishtirok etdi.
Investitsiyalar, sanoat va savdo sohasida erishilgan yutuqlarni ta’kidlab, ikki mamlakat iqtisodiyotlarining ishga solinmagan salohiyati hamda neft-kimyo, kimyo, elektrotexnika, to‘qimachilik, oziq-ovqat, farmatsevtika, zargarlik, avtomobilsozlik va boshqa sohalarda o‘zaro manfaatli hamkorlikni yanada rivojlantirish uchun mavjud shart-sharoitlar qayd etildi.
Ikki mamlakat o‘rtasidagi iqtisodiy hamkorlikning izchil diversifikatsiya qilinishi o‘zbek va ozarbayjon ishlab chiqaruvchilariga yangi qiymat zanjirlarini yaratish va birgalikda uchinchi mamlakatlar bozorlariga chiqish imkonini berishi ta’kidlandi.
Shuningdek, ikki mamlakat hududlari orqali o‘zaro va tranzit yuk tashishni ko‘paytirishni rag‘batlantirish bo‘yicha aniq chora-tadbirlar joriy qilinishi e’lon qilindi Bu, o‘z navbatida, transport va logistika sohasida O‘zbekiston-Ozarbayjon hamkorligini chuqurlashtiradi.
Uchrashuv yakunlari bo‘yicha umumiy qiymati 500 million dollardan ortiq qo‘shma loyihalar va savdo shartnomalarini amalga oshirish bo‘yicha qator bitimlar, shuningdek, ikki mamlakatning tegishli vazirlik va idoralari o‘rtasida amaliy hamkorlik to‘g‘risida 10 ta kelishuv imzolandi.
Eslatib o‘tamiz, Shavkat Mirziyoyevning taklifiga binoan Ozarbayjon prezidenti Ilhom Aliyev 21—22-iyun kunlari davlat tashrifi bilan O‘zbekistonda bo‘ladi. Sammit kun tartibidan O‘zbekiston—Ozarbayjon strategik sheriklik munosabatlarini yanada mustahkamlash va ko‘p qirrali hamkorlikni kengaytirish masalalari o‘rin olgan.
Izoh (0)