Surxondaryo viloyatining Qumqo‘rg‘on tumaniga yangi hokim tayinlandi. Bu haqda “Daryo”ga viloyat hokimligi axborot xizmati rahbari Murodbek Davlatov xabar berdi.
Ma’lum bo‘lishicha, bugun Xalq deputatlari Qumqo‘rg‘on tumani Kengashining navbatdan tashqari sessiyasi bo‘lib o‘tib, unda tashkiliy masala ko‘rib chiqilgan.
“Viloyat hokimi To‘ra Bobolov mahalliy Kengash deputatlari, viloyat, tuman hokimligi va davlat, jamoat tashkilotlari mutasaddilari ishtirok etgan sessiyada tumanni ijtimoiy- iqtisodiy rivojlantirish ko‘rsatkichlari pastligicha qolayotgani, aholi turmush sharoitini oshirishga yetarli e’tibor berilmayotgani tanqid qilindi. Sessiyada shu kunga qadar tuman hokimi lavozimida ishlab kelayotgan Gapparov Rahmatullo Boboxonovich vazifasidan ozod etildi”, — deyiladi hokimlik axborotida.
Qo‘shimcha qilinishicha, tuman hokimi lavozimini 2021-yildan buyon Termiz shahri bo‘yicha ichki ishlar organlari faoliyatini muvofiqlashtirish boshqarmasi boshlig‘i lavozimida ishlab kelgan Anvar Normamatov egallagan.
Anvar Normamatov 1981-yil 10-martda Angor tumanida tug‘ilgan bo‘lib, 2003-yil O‘zbekiston Respublikasi ichki ishlar vazirligi Akademiyasini tugatgan. Ma’lumoti bo‘yicha mutaxassisligi huquqshunos. U 2003—2021-yillarda Surxondaryo viloyati ichki ishlar organlarida turli lavozimlarda faoliyat yuritgan.
Izoh (0)