Qashqadaryo viloyatining G‘uzor tumani hududida joylashgan GTL zavodida avariya yuz bergani, bir kishi vafot etib, ikki kishi kuyish tan jarohatini olgani aytilmoqda. Bu haqda “Daryo”ga shu zavod ishchilaridan biri xabar berdi.
“Daryo” muxbiri bilan suhbatlashgan kosonlik Shavkat Normurodov o‘g‘li shu zavodda ishlashini, zavoddagi avariya sabab o‘g‘lining qo‘li va yuzi kuyganini aytmoqda.
“Juda vahimali joyi yo‘q. Shunchaki qo‘li va yuzi ozgina, to‘g‘rirog‘i 7 foiz kuygan”, — deydi Shavkat Normurodov.
Suhbatdoshning aytishicha, uning o‘g‘li Abdulaziz Yaxshiboyev GTL zavodida anchadan beri faoliyat yuritadi. Yuzi va qo‘li kuygan o‘g‘li hozirda Qarshi shahridagi Temir yo‘l shifoxonasida davolanmoqda.
Qashqadaryo viloyat Favqulodda vaziyatlar boshqarmasi axborot xizmati rahbari Sohib Vaitov zavodda katta yong‘in sodir bo‘lgani aniq emasligini aytib, bu haqda ularda ma’lumot yo‘qligini bildirmoqda.
“Bizga bu haqida xabar berilmagan, chaqiruv bo‘lmagan. Ammo zavoddagi qutqaruv bo‘linmamiz xodimlari voqeani zavod xodimlaridan eshitib, voqea joyiga yetib borgan. Xodimlarimiz voqea joyiga borganida hech qanday portlash sodir bo‘lganini ko‘rmagan. Faqat germetik yorilib, bug‘ chiqish holatini ko‘rgan. Jarohat olganlar yoki vafot etganlar haqida bizga ma’lum emas”, — deydi Sohib Vaitov.
Mas’ulning ma’lumot berishicha, boshqarma boshlig‘i o‘rinbosari voqea haqida gap tarqalgach, zavodga borgan.
“Biz borib o‘rgangunga qadar voqea yashirilgan bo‘lmasa, biz bilan holat faqat bug‘ chiqishi bilan bog‘liq jarayon ekan. Bizga ma’lumi hozircha shu”, — deydi boshqarma axborot xizmati rahbari.
“O‘zbekneftgaz” AJ axborot xizmati zavodda avariya sodir bo‘lgani, bir nafar ishchi vafot etib, ikki nafar ishchi kuyish tan jarohati olganini rad etmoqda.
Mas’ullarga ko‘ra, avariya sodir bo‘lgani aytilgan kun — 18-iyun soat 20:30 da zavodning havo ajratish qurilmasi (10-sonli qurilma)ni ishga tushirishga tayyorlash jarayoni bo‘lib o‘tgan.
“Qurilmaning suyuq kislorod saqlash tizimidagi quvurida o‘rnatilgan boshqarish klapanining ulanish qismida yuqori tozalikdagi kislorod (99,99 foiz) sizib chiqqan va bu vaqtda yuzaga kelishi mumkin bo‘lgan ehtimoliy avariya holatining oldini olish maqsadida barcha zarur choralar ko‘rilib zavodning yong‘in o‘chirish, birinchi tez tibbiy yordam xizmatlari shay holatga keltirilgan.
Bu tabiiy holat bo‘lib, yangi qurib bitkazilgan qurilmalarning ish boshlash jarayonida sizib chiqish holati kuzatilishi mumkin. Shu sabab, GTL zavodida ayni kunlarda to‘liq 24 soatlik ish rejimi tashkil qilingan bo‘lib, navbatchilik va vaxta rejimida ishchilar-xodimlar jumladan smena muhandislari, mas’ul smena boshliqlari faoliyat olib borishmoqda”, — deyiladi “O‘zbekneftgaz” AJ axborot xizmati rasmiy ma’lumotida.
Izoh (0)