Сурхондарё вилоятининг Қумқўрғон туманига янги ҳоким тайинланди. Бу ҳақда «Дарё»га вилоят ҳокимлиги ахборот хизмати раҳбари Муродбек Давлатов хабар берди.
Маълум бўлишича, бугун Халқ депутатлари Қумқўрғон тумани Кенгашининг навбатдан ташқари сессияси бўлиб ўтиб, унда ташкилий масала кўриб чиқилган.
«Вилоят ҳокими Тўра Боболов маҳаллий Кенгаш депутатлари, вилоят, туман ҳокимлиги ва давлат, жамоат ташкилотлари мутасаддилари иштирок этган сессияда туманни ижтимоий- иқтисодий ривожлантириш кўрсаткичлари пастлигича қолаётгани, аҳоли турмуш шароитини оширишга етарли эътибор берилмаётгани танқид қилинди. Сессияда шу кунга қадар туман ҳокими лавозимида ишлаб келаётган Гаппаров Раҳматулло Бобохонович вазифасидан озод этилди», — дейилади ҳокимлик ахборотида.
Қўшимча қилинишича, туман ҳокими лавозимини 2021 йилдан буён Термиз шаҳри бўйича ички ишлар органлари фаолиятини мувофиқлаштириш бошқармаси бошлиғи лавозимида ишлаб келган Анвар Нормаматов эгаллаган.
Анвар Нормаматов 1981 йил 10 мартда Ангор туманида туғилган бўлиб, 2003 йил Ўзбекистон Республикаси ички ишлар вазирлиги Академиясини тугатган. Маълумоти бўйича мутахассислиги ҳуқуқшунос. У 2003—2021 йилларда Сурхондарё вилояти ички ишлар органларида турли лавозимларда фаолият юритган.
Изоҳ (0)