Namangan viloyati Uychi tumanida bitta sport zalida shug‘ullanib yurgan yigitlar o‘rtasidagi o‘zaro tortishuv katta janjalga aylanib ketdi. Bu haqda Ichki ishlar vazirligi xabar berdi.
“Murabbiyning oldiga so‘rashgani o‘tdim. Ular bilan quchoqlashib ko‘rishdik, oldidagi o‘rtoqlari esa o‘tirvolib, qo‘lni qisib so‘rashdi. Qo‘lni qismang, deb to‘g‘ri gapirdim… Ishxonasiga olib kirib, ukamni urvordi, keyin men kirdim. Chiroyli gaplashib turgan edik, meni ham urvordi, men ham urishga majbur bo‘ldim”, — deydi sportchi.
Katta sportda tajribaga ega bo‘lgan murabbiy do‘sti uchun qasos olish maqsadida shogirdini “samosud” qilib, mushtlashgan.
Voqea joyiga zudlik bilan yetib borgan tuman Ichki ishlar bo‘limi xodimlari vaziyatni bartaraf etgan, hodisaga aloqador barcha IIBga olib borilgan. Hodisa oqibatida jarohatlangan yigitlardan biriga tibbiy yordam ko‘rsatilgan.
Qayd etilishicha, mazkur holat yuzasidan Jinoyat kodeksining 277-moddasi (bezorilik) 3-qismi “v” bandi bilan jinoyat ishi qo‘zg‘atilgan va aybdor shaxslar Jinoyat protsessual kodeksining 221-moddasi (ushlab turish asoslari) tartibida ushlangan.
Avvalroq Qashqadaryoda o‘g‘irlik qilgan fuqaro “samosud” qilingani, Jizzaxda bir qizni “samosud” qilgan o‘quvchi qizlarning ota-onalari javobgarlikka tortilgani, Qoraqalpog‘istonda bir guruh ayollar boshqa bir ayolni “samosud” qilgani to‘g‘risida xabar berilgandi.
Izoh (0)