Rossiyaning Buyuk Britaniyadagi elchisi Andrey Kelin va boshqa rossiyalik diplomatlarga, alohida xabar berilmagunicha, Britaniya parlamenti binosiga kirish taqiqlab qo‘yildi, deb yozadi “RBK”. Bu haqda The Guardian gazetasi lordlar palatasi va jamoatchilik palatasi spikerlari tomonidan tarqatilgan xabarga tayanib ma’lum qilgan.
“Rossiya hukumatining rasman akkreditatsiya qilingan vakili sifatida, elchi [Andrey Kelin] yana xabar berilmagunicha, parlament qarorgohiga qo‘yilmaydi”, — deyiladi xabarda.
Nashr qayd etishicha, rossiyalik diplomatlar va rasmiy shaxslar uchun taqiq Britaniyada birinchi marta yozma shaklda tasdiqlangan.
Rossiyaning Ukrainadagi harbiy operatsiyasi boshlanganidan buyon rossiyalik diplomatlarga tadbirlarda qatnashish bir necha marta taqiqlangandi.
Xususan, konslagerning ozod etilishiga 77 yil to‘lishiga bag‘ishlangan xotirlash marosimiga “Buxenvald” va “Dora-Mittelbau” yodgorlik majmualari ma’muriyati rossiyalik va belaruslik mansabdorlarni kiritmagan edi.
May oyi boshida ba’zi Yevropa mamlakatlari, masalan, Avstriya va Fransiyadagi Rossiya elchixonalari 8-may kuni natsistlar istilosidan ozod bo‘lish va Ikkinchi jahon urushi tugashi xotirasiga atalgan tadbirga taklif etilmagani haqida bildirishnoma olgan.
Rossiyaning Yaponiyadagi elchisi Mixail Galuzin Xirosima ma’muriyati rossiyalik diplomatlarni 6-avgust kuni AQSH tomonidan atom bombardimoni qurbonlari xotirasiga bag‘ishlangan tadbirga taklif qilishdan bosh tortganini aytgandi. Elchi Rossiyani taklif qilishdan bosh tortishni “uyatli qadam” deb atagan edi.
Izoh (0)