2021-yilgi tinchlik bo‘yicha Nobel mukofoti sovrindori, Rossiyaning “Novaya gazeta” nashri bosh muharriri Dmitriy Muratovning medali auksionda 103,5 million dollarga sotildi, deb yozadi “RBK” Amerikaning kimoshdi savdosini o‘tkazgan Heritage Auctions savdo uyiga tayanib.
Auksion boshlanishidan oldin jurnalistdan haqiqatan ham medalini sotishga tayyorligi haqida so‘rashdi. Muratov tasdiq javobini berdi. Avvalroq u mukofotni sotish qarorini “Novaya gazeta”ning butun jamoasi qo‘llab-quvvatlaganini aytgandi.
Lotning boshlang‘ich qiymati 700 ming dollarni tashkil qildi, ammo bir necha daqiqa ichida narx 16,6 million dollargacha ko‘tarildi. So‘ng anonim xaridor medalga 103,5 million dollar tikdi, bu stavkadan auksionning hech bir ishtirokchisi osha olmadi.
Savdo uyi xabarida aytilishicha, medalni sotishdan tushgan pullarning barchasi BMTning xalqaro Bolalar jamg‘armasi (UNICEF)ga Ukraina va qo‘shni mamlakatlardagi bolalarga yordam berish uchun yo‘naltiriladi. Shuningdek, mablag‘larning bir qismi Ukrainadan chiqqan qochqinlar va mamlakat ichkarisida ko‘chirilganlarning oilalariga ko‘mak berishga sarflanadi.
Kimoshdi savdosi Nyu-Yorkda, Manxettendagi Tayms markazida bo‘lib o‘tdi va 20-iyunda nishonalandigan Jahon qochqinlar kuniga bag‘ishlandi.
Eslatib o‘tamiz, 2021-yil 8-oktabr kuni tinchlik bo‘yicha Nobel mukofotiga Rossiyaning “Novaya gazeta” nashri bosh muharriri Dmitriy Muratov va filippinlik jurnalist, Rapple muxolifatchi sayti rahbari Mariya Ressa sazovor bo‘ldi. Nobel mukofoti ularga “demokratiya hamda barqaror tinchlik o‘rnatilishining dastlabki sharti bo‘lgan fikr bildirish erkinligini himoya qilish bo‘yicha intilishlari” uchun berilgan.
2021-yil dekabrida Dmitriy Muratov va’da qilganidek, o‘ziga berilgan tinchlik bo‘yicha Nobel mukofoti mablag‘larini xayriyaga topshirdi. Mukofotning umumiy summasi qariyb 40,2 million rublni (546 ming dollar) tashkil etgan. Pul tashkilotlar o‘rtasida taqsimlangan bo‘lib, ular “sheriklar” – “Novaya gazeta”ni xayriya bilan qo‘llab-quvvatlagan o‘quvchilar orasidan ovoz berish yo‘li bilan tanlangan.
Dmitriy Muratov — “Novaya gazeta” asoschilaridan biri bo‘lib, 1995-yildan buyon nashrga bosh muharrirlik qilib keladi. Gazeta inson huquqlari buzilishi mavzusidagi surishtiruvlar va maqolalari bilan taniqli.
28-mart kuni “Novaya gazeta” o‘z faoliyatini vaqtinchalik to‘xtatdi. Bu “Roskomnadzor” nashrga maqolada notijorat tashkilot-xorijiy agent markirovkasi yo‘qligi tufayli ikkinchi marta ogohlantirish yuborganidan keyin yuz berdi.
Tahririyatning ba’zi xodimlari chet elga ketib, “Novaya gazeta. Yevropa” nashrini ochdi. 29-aprel kuni “Roskomnadzor” uning saytini Rossiya hududida bloklab qo‘ydi.
Izoh (0)