“Aeroflot” tarkibiga kiruvchi “Rossiya” aviakompaniyasi Moskvadan Toshkentga to‘g‘ridan to‘g‘ri muntazam reyslarni yo‘lga qo‘yadi. Parvozlar 25-iyundan boshlab Sheremetyevo aeroportidan haftasida to‘rt marta amalga oshiriladi, deb xabar beradi aviakompaniya matbuot xizmati.
Jadvalga muvofiq Moskva—Toshkent—Moskva yo‘nalishi bo‘yicha parvozlar haftaning seshanba, payshanba, shanba va yakshanba kunlari amalga oshiriladi.
Moskvadan soat 08:05 da uchgan samolyot Toshkentga soat 14:10 da kelib qo‘nadi, qayta reys soat 15:40 da uchadi va 17:45 da borib qo‘nadi — mahalliy vaqtlar bo‘yicha.
“Rossiya” aviakompaniyasi ushbu yo‘nalishda mahalliy Superjet 100 samolyotlaridan foydalanadi. Bortdagi umumiy o‘rinlar soni 87 ta bo‘lib, ularning 12 tasi — biznes-klass va 75 ta — ekonom-klass.
Iyun boshlarida Rossiya va O‘zbekiston aviatsiya ma’muriyati Moskva—Toshkent yo‘nalishida parvozlar chastotasini oshirish bo‘yicha kelishuvga erishgandi. Rossiya va O‘zbekiston o‘rtasidagi havo qatnovini rivojlantirish maqsadida aviatsiya rahbariyatlari Moskva—Toshkent yo‘nalishi bo‘yicha parvozlar chastotasini haftasiga 25 reysdan 39 tagacha oshirishga kelishib olgan.
Avvalroq Uzbekistan Airways Express Toshkentdan Samaraga parvozlarni yo‘lga qo‘ymoqchiligi, Uzbekistan Airways Sochiga aviaqatnovlarni uzaytirgani to‘g‘risida xabar berilgandi.
Izoh (0)