2022 йилнинг бошларида Элтуз ва Uzmetronom нашрлари Масс-медиа фонди раиси Комил Алламжоновни 4,2 миллион долларлик тилла ва бриллиант буюмларни божсиз олиб киришда иштирок этгани иддао қилинган мақолалар эълон қилган эди.
Шундан сўнг Комил Алламжонов буни туҳмат деб атаб, «Uzmetronom.com» сайти асосчиси Сергей Ежков устидан ҳуқуқни муҳофаза қилувчи органларга арз қилганди.
21 июнь куни Элтуз нашри мақоладаги иддаолар «тўлиқ тасдиғини топмагани важидан» ўз сайти ва тармоқлардаги барча саҳифаларидан олиб ташлаганини маълум қилди. Шунингдек, таҳририят мақолани қайта чоп этган нашрлар, жумладан Uzmetronom сайти ва унга Twitter’да ҳавола берган «Чегара билмас мухбирлар» ташкилотини ўз қароридан расман хабардор қилган.
«Мақолани бўлишган бошқа нашр ва аккаунтларнинг кўпчилигига бу борада расмий билдирги йўлланди. Ушбу баёнот билан мақолани чоп этишдан ҳеч бир шаклда ҳеч бир шахсни обрўсизлантириш ёки унга туҳмат қилиш қасд этилмаганини таъкидлаган ҳолда уни бўлишган, қайта чоп қилган бошқа нашр, канал ва саҳифа эгаларидан мақолани олиб қўйишларини сўраймиз.
Мақоладаги иддаоларни қайта текшириш жараёнида биз билан ўзаро тушуниш асосида ҳамкорлик қилган томонлар, нашрлар ва якуний қароримизни ҳурмат қилган Элтуз ўқувчиларига ўз миннатдорчилигимизни билдирамиз. Шунингдек, таҳририят репутацион зарар учун мақолада кўрсатилган шахс Комил Алламжоновдан узр сўраган ҳолда, унинг Ўзбекистонда сўз эркинлигини таъминлаш йўлидаги саъй- ҳаракатларига омад тилайди.
Таҳририят Германия қонунчилиги асосида суд томонидан тайинланиши мумкин бўлган жаримани тўлашга тайёрлигини билдиради», – дейилади Элтуз нашри хабарида.
Бунинг ортидан Комил Алламжонов видеомурожаат қилиб, ўз фикрларини билдириб ўтди.
«Сўз эркинлиги ҳамма хоҳлаган нарсасини гапириши мумкин дегани эмас: шахснинг қадр-қиммати, бирор бир шахс ҳақидаги маълумот берилса, у албатта ишончли далилларга суянилган бўлиши керак. Туҳмат, ҳақорат ҳеч қайси давлатда, ҳеч қайси жамиятда мумкин эмас. Бунга жавобгарлик белгиланган. Шу жумладан Ўзбекистон қонунчилигида ҳам.
Ўйлайманки, мен билан боғлиқ ҳолатлар барча учун намуна бўлади. Яна бир марта айтаман, сўз эркинлиги бу ҳамма нарса мумкин дегани эмас, унинг тартиб-қоидаси бор, ўзига яраша этикаси бор. Унга амал қилсаккина биз ҳеч қачон ютқазмаймиз», – деди Алламжонов.
Изоҳ (0)