O‘zbekistonda 2021-yilda berilgan eng katta pora miqdori ma’lum qilindi

AOKAda o‘tkazilgan brifingda Korrupsiyaga qarshi kurashish agentligi axborot xizmati rahbari Durdona Ochilova pora olish bilan bog‘liq jinoyatlar tahlili haqida ma’lumot berdi.

Ma’lum qilinishicha, joriy yilning o‘tgan 5 oyi davomida 17 ta pora olish jinoyati sodir etilgan. Bu o‘tgan 2021-yilning 5 oyiga nisbatan 40 taga kam.

2021-yilda 91 ta pora olish jinoyati sodir etilgan. Ularning 49 tasi birinchi darajali rahbar, 8 tasi rahbar o‘rinbosari, 34 tasi ijrochi va texnik xodim ishtirokida bo‘lgan. Pora olganlarning 77 nafari erkak, 14 nafari ayol hisoblanadi.

Sohalar kesimida tahlil qilinganda, 91 ta pora olish jinoyatidan 20 tasi ichki ishlar (8 tasi yo‘l harakati xavfsizligi), 12 tasi maktabgacha ta’lim, 10 tasi hokimlik, 6 tasi harbiy, 6 tasi qishloq xo‘jaligi, 4 tasi xalq ta’limi, 4 tasi qurilish, 3 tasi kommunal xizmat (elektr, gaz, suv) va 26 tasi boshqa sohalar hisobiga to‘g‘ri kelgan. Shuningdek, 91 ta pora olish jinoyatidan 26 tasi yoki 28,5 foizi bevosita sud va huquqni muhofaza qilish organlari xodimlari tomonidan sodir etilgan bo‘lib, umumiy pora olish jinoyatining deyarli uchdan bir qismiga to‘g‘ri kelgan.

Eng ko‘p pora miqdori 2 million dollarni, eng kam pora miqdori 50 dollarni tashkil etgan. O‘rtacha pora miqdori 37 819 dollarni yoki 3,92 million so‘mni tashkil etgan.

Qayd etilishicha, yillar kesimida 2019-yilda 177 ta, 2020-yilda 161 ta, 2021-yilda 91 ta pora olish jinoyati sodir etilgan. Pora olish jinoyati so‘nggi uch yilda deyarli 50 foizga kamaygan.

Hududlar kesimida tahlil qilingandagi ko‘rsatkichlar:

• Toshkent shahrida – 18 ta;
• Toshkent viloyatida – 13 ta;
• Jizzax viloyatida – 9 ta;
• Andijon viloyatida – 8 ta;
• Qashqadaryo viloyatida – 8 ta;
• Surxondaryo viloyatida – 7 ta;
• Samarqand viloyatida – 5 ta;
• Buxoro viloyatida – 4 ta;
• Namangan viloyatida – 4 ta;
• Farg‘ona viloyatida – 4 ta;
• Xorazm viloyatida – 4 ta;
• Sirdaryo viloyatida – 3 ta;
• Navoiy viloyatida – 2 ta;
• Qoraqalpog‘iston Respublikasida – 2 ta.