Shavkat Mirziyoyev 20-iyun kuni Konstitutsiyaviy komissiya a’zolari bilan o‘tkazilgan uchrashuvda O‘zbekistonning Milliy xavfsizlik va Tashqi siyosiy faoliyati konsepsiyalari yangi tahrirda ishlab chiqish kerakligini aytdi.
Prezident matbuot xizmatining xabar berishicha, davlat rahbari Konstitutsiyaga O‘zbekiston barcha davlatlar, eng avvalo o‘zining yaqin qo‘shnilari bilan tinchlikparvar va do‘stona siyosat yuritishi, uning tashqi siyosati inson huquqlari va erkinliklarini hurmat qilish, davlatlarning hududiy yaxlitligi prinsip va normalariga asoslanishi haqidagi moddani qo‘shishni taklif etdi.
Shuningdek, O‘zbekiston va jahonda tub o‘zgarishlar yuz berayotgan hozirgi sharoitda, mamlakat tashqi siyosatining konseptual-huquqiy asoslarini yangilash va takomillashtirish alohida dolzarb ahamiyat kasb etayotganini ta’kidladi.
“Shu munosabat bilan hozirgi paytda keng omma muhokamasida bo‘lib turgan konstitutsion islohotlarni inobatga olib, O‘zbekiston Respublikasining Milliy xavfsizlik konsepsiyasi hamda O‘zbekiston Respublikasining Tashqi siyosiy faoliyati konsepsiyasini yangi tahrirda ishlab chiqish zarur, deb hisoblayman.
Mazkur hujjatlarning o‘ta muhimligidan kelib chiqib, ushbu Konsepsiyalarni ham Konstitutsiyaviy qonun shaklida qabul qilishni taklif etaman”, — degan Shavkat Mirziyoyev.
Izoh (0)