Ўзбекистонда 2021 йилда берилган энг катта пора миқдори маълум қилинди

АОКАда ўтказилган брифингда Коррупцияга қарши курашиш агентлиги ахборот хизмати раҳбари Дурдона Очилова пора олиш билан боғлиқ жиноятлар таҳлили ҳақида маълумот берди.

Маълум қилинишича, жорий йилнинг ўтган 5 ойи давомида 17 та пора олиш жинояти содир этилган. Бу ўтган 2021 йилнинг 5 ойига нисбатан 40 тага кам.

2021 йилда 91 та пора олиш жинояти содир этилган. Уларнинг 49 таси биринчи даражали раҳбар, 8 таси раҳбар ўринбосари, 34 таси ижрочи ва техник ходим иштирокида бўлган. Пора олганларнинг 77 нафари эркак, 14 нафари аёл ҳисобланади.

Соҳалар кесимида таҳлил қилинганда, 91 та пора олиш жиноятидан 20 таси ички ишлар (8 таси йўл ҳаракати хавфсизлиги), 12 таси мактабгача таълим, 10 таси ҳокимлик, 6 таси ҳарбий, 6 таси қишлоқ хўжалиги, 4 таси халқ таълими, 4 таси қурилиш, 3 таси коммунал хизмат (электр, газ, сув) ва 26 таси бошқа соҳалар ҳисобига тўғри келган. Шунингдек, 91 та пора олиш жиноятидан 26 таси ёки 28,5 фоизи бевосита суд ва ҳуқуқни муҳофаза қилиш органлари ходимлари томонидан содир этилган бўлиб, умумий пора олиш жиноятининг деярли учдан бир қисмига тўғри келган.

Энг кўп пора миқдори 2 миллион долларни, энг кам пора миқдори 50 долларни ташкил этган. Ўртача пора миқдори 37 819 долларни ёки 3,92 миллион сўмни ташкил этган.

Қайд этилишича, йиллар кесимида 2019 йилда 177 та, 2020 йилда 161 та, 2021 йилда 91 та пора олиш жинояти содир этилган. Пора олиш жинояти сўнгги уч йилда деярли 50 фоизга камайган.

Ҳудудлар кесимида таҳлил қилингандаги кўрсаткичлар:

• Тошкент шаҳрида – 18 та;
• Тошкент вилоятида – 13 та;
• Жиззах вилоятида – 9 та;
• Андижон вилоятида – 8 та;
• Қашқадарё вилоятида – 8 та;
• Сурхондарё вилоятида – 7 та;
• Самарқанд вилоятида – 5 та;
• Бухоро вилоятида – 4 та;
• Наманган вилоятида – 4 та;
• Фарғона вилоятида – 4 та;
• Хоразм вилоятида – 4 та;
• Сирдарё вилоятида – 3 та;
• Навоий вилоятида – 2 та;
• Қорақалпоғистон Республикасида – 2 та.