Ijtimoiy tarmoqlarda Surxondaryo viloyati hokimi To‘ra Bobolov talaba qizga 1 milliard so‘m stipendiya sertifikatini bergan surat tarqaldi. “Daryo”ning bu haqdagi so‘roviga javob bergan hokimlik axborot xizmati bu pullar 300 nafar talabaga atalganini bildirdi.
“Viloyatda o‘tkazilgan yoshlar forumida talaba qiz Aziza Qosimova iqtidorli talabalar vakili sifatida sahnaga chiqib, viloyat rahbaridan 1 milliard so‘mlik hokim stipendiyasi sertifikatini qabul qilib olgan. Aslida bu pullar 300 nafar iqtidorli talabaga ikki bosqichli tanlov asosida beriladi”, — deydi To‘ra Bobolovning matbuot kotibi Murodbek Davlatov.
Aniqlik kiritilishicha, 2022—2023-o‘quv yilida sakkiz oylik o‘quv jarayonlarida ikki bosqichli tanlov asosida 300 nafar talaba saralab olinadi. Sentabr, oktabr, noyabr, dekabr oylari uchun 150 nafar talaba, mart, aprel, may hamda iyun oylari uchun 150 nafar talabaga shu 1 milliard so‘m hisobidan stipendiyalar beriladi.
“Ijtimoiy tarmoq foydalanuvchilaridan tekshirilmagan, asossiz, surishtirilmagan axborotlarni tarqatib, jamoatchilik orasida turlicha talqin qilmaslikni so‘rab qolamiz. Kimga to‘g‘ri va aniq axborot kerak bo‘lsa, viloyat hokimligi axborot xizmatiga murojaat qilishsa, biz har doim tezkor ravishda javob berishga tayyormiz”, — deydi Murodbek Davlatov.
Mavzuga doir:
- “Axborot xizmati rahbari viloyat hokimining o‘ng qo‘li bo‘lishi kerak” — To‘ra Bobolov
- “Hokimning bolasi ham boshqalarning farzandidek, ularning ham orzu-havasi bor”. To‘ra Bobolov hokimlar farzandiga qimmatbaho sovg‘a berishi haqida gapirdi
- “Sog‘lig‘im yaxshi edi, ko‘proq yotib qolganim uchun xavotir olishdi deb o‘yladim”. To‘ra Bobolov internetda uni “o‘ldirib qo‘yishgani” haqida gapirdi
- Surxondaryo hokimi To‘ra Bobolov: “Boqimanda kayfiyatidagi hokimlar ham bor”
Izoh (0)