Qashqadaryo viloyatining G‘uzor tumani hokimi Bekzod Suyunov mol boqib yurgan cho‘pon bolaga kitob va bosh kiyim sovg‘a qildi. Bu haqda hokimlik axborot xizmati ma’lum qilgan.
Ta’kidlanishicha, hokim 20-iyun kuni tumanning “Xumdon” mahallasiga borib, yangi qurilishi mo‘ljal qilingan maktab va bog‘cha uchun ajratilgan yer maydonini kuzatgan.
“Tuman hokimi Bekzod Suyunov yer maydoni bilan tanishar ekan, atrofda chorva mollarini boqib yurgan bolakay va uning qo‘lidagi qartaga ko‘zi tushdi. Shunda hokim bolakayni yoniga chaqirib, u bilan yaqindan tanishdi. Qo‘lidagi qartasini oldi va unga qarta o‘ynash yaxshilikka olib bormasligi, buning o‘rniga kitob o‘qish lozimligini ta’kidladi”, — deyiladi hokimlik xabarida.
Qo‘shimcha qilinishicha, bolakayning ismi Quvonchbek Nurmanov bo‘lib, 14 yoshda.
“Shu kunning o‘zida Quvonchbekka tuman hokimining esdalik sovg‘asi va kitoblar to‘plami yetkazildi. Bundan tashqari Quvonchbekning ta’lim olishi tuman hokimining alohida nazoratiga olindi”, — deydi hokimlik axborot xizmati rahbari Xudoyberdi Yo‘ldoshev.
Bekzod Suyunov birinchi maoshini kambag‘alga berishi va 5 million so‘m mukofot pulini ham kam ta’minlangan ayolga hadya qilishi bilan jamoatchilikka yaxshi tanilgandi.
Izoh (0)