Қашқадарё вилоятининг Ғузор тумани ҳокими Бекзод Суюнов мол боқиб юрган чўпон болага китоб ва бош кийим совға қилди. Бу ҳақда ҳокимлик ахборот хизмати маълум қилган.
Таъкидланишича, ҳоким 20 июнь куни туманнинг «Хумдон» маҳалласига бориб, янги қурилиши мўлжал қилинган мактаб ва боғча учун ажратилган ер майдонини кузатган.
«Туман ҳокими Бекзод Суюнов ер майдони билан танишар экан, атрофда чорва молларини боқиб юрган болакай ва унинг қўлидаги қартага кўзи тушди. Шунда ҳоким болакайни ёнига чақириб, у билан яқиндан танишди. Қўлидаги қартасини олди ва унга қарта ўйнаш яхшиликка олиб бормаслиги, бунинг ўрнига китоб ўқиш лозимлигини таъкидлади», — дейилади ҳокимлик хабарида.
Қўшимча қилинишича, болакайнинг исми Қувончбек Нурманов бўлиб, 14 ёшда.
«Шу куннинг ўзида Қувончбекка туман ҳокимининг эсдалик совғаси ва китоблар тўплами етказилди. Бундан ташқари Қувончбекнинг таълим олиши туман ҳокимининг алоҳида назоратига олинди», — дейди ҳокимлик ахборот хизмати раҳбари Худойберди Йўлдошев.
Бекзод Суюнов биринчи маошини камбағалга бериши ва 5 миллион сўм мукофот пулини ҳам кам таъминланган аёлга ҳадя қилиши билан жамоатчиликка яхши танилганди.
Изоҳ (0)