Qashqadaryodagi tashkilot ishchilari uch oydan beri maosh ololmayotganini aytmoqda

“Transyo‘lqurilish” DUK Qarshi filiali ishchilari uch oydan beri maosh ololmayotganini aytmoqda. Bu haqda “Daryo”ga ishchilar vakili Roziq Jumanazarov ma’lum qildi.

Aytilishicha, maoshsiz qolayotgan ishchilar “Transyo‘lqurilish” DUK Qarshi filialining haydovchi va mexanizatorlari hisoblanadi.

“Uch oydan beri maosh olmayapmiz. Bizda ham oila bor. Bola-chaqani boqishimiz kerak. Biz ham insonmiz-ku. Nega endi mehnat qilsak-da, maosh ololmasak. Buni kimdir nazorat qiladimi?”, — deydi Roziq Jumanazarov.

Murojaatchilarning aytishicha, uch oydan beri maoshsiz qolayotgan xodimlar 60-70 nafarni tashkil qiladi.

“Rahbariyatdan maoshsiz qolayotganimiz sababini so‘rasak, asosiy pullar soliqqa to‘lanayotganini aytmoqda”, — deydi ishchilar.

“Daryo”ning bu haqdagi so‘roviga javob bergan “Transyo‘lqurilish” DUK Qarshi filiali rahbari To‘lqin Bobomurodov ishchilar maoshsiz qolayotganini tasdiqladi.

“Haqiqatdan ham shu muammomiz bor. Biz odatda viloyat Avtomobil yo‘llari bosh boshqarmasiga yo‘l ta’miri uchun texnika va asfalt beramiz. Prezidentimizning Qashqadaryo viloyatidagi GTL zavodiga tashrifidan avval Qashqadaryo viloyati Avtomobil yo‘llari bosh boshqarmasiga yo‘l ta’miri uchun texnikalar va mahsulot yetkazib berganmiz. Aynan shu ish uchun 2-3 milliard so‘m pul olishimiz kerak. Ammo viloyat Avtomobil yo‘llari bosh boshqarmasi pullarimizni bermayapti. Biz esa ishchilarga maosh to‘lolmayapmiz”, — deydi “Transyo‘lqurilish” DUK Qarshi filiali rahbari To‘lqin Bobomurodov.

To‘lqin Bobomurodovning aytishicha, viloyat Avtomobil yo‘llari bosh boshqarmasining tumandagi tashkilotlari ham ulardan qarzdor. Ammo pulini o‘z vaqtida to‘lab bermayapti.

“Oyiga taxminan 300 million so‘mdan maosh bersak, uch oy uchun ishchilardan 900 million so‘m qarzdorligimiz bor”, — deydi “Transyo‘lqurilish” DUK Qarshi filiali rahbari.

Qashqadaryo viloyat Avtomobil yo‘llari bosh boshqarmasi mas’uli Fayzulla Xudoyqulov “Daryo” so‘roviga javoban GTL zavodiga olib boruvchi yo‘l ta’miri uchun sarflangan 40 milliard 150 million so‘m mablag‘ haligacha to‘lab berilmaganini ma’lum qildi.

“Qachonki shu pullar respublika budjetidan bizga berilsa, biz ‘Transyo‘lqurilish’ DUK Qarshi filialidagi qarzdorligimizni to‘lab beramiz”, — deydi Fayzulla Xudoyqulov.