“Spartak” yozda Oston O‘runov bilan shartnomani bekor qiladi

Yarim himoyachi Oston O‘runov “Spartak”ni tark etadi.

“RB Sport” xabariga ko‘ra, Moskva klubining 21 yoshli o‘zbekistonlik futbolchi bilan yozgi transfer oynasi yopilgunga qadar shartnomani bekor qilish ehtimoli yuqori.

Tomonlar o‘rtasidagi amaldagi kelishuv 2025-yilgacha mo‘ljallangan. Moskvaliklar O‘runov bilan shartnomani bir tomonlama bekor qilsa, futbolchining kelishuvda ko‘rsatilgan muddatga qadar maoshini to‘lab berishiga to‘g‘ri keladi.

Ma’lumot uchun, O‘runov 2020/21-yilgi mavsum o‘rtasidan boshlab “Ufa”da ijara asosida o‘ynadi. Biroq klub mavsum yakuniga ko‘ra quyi ligaga tushib ketdi.

Avvalroq Oston O‘runovning “Spartak”da oyiga 50 ming yevro, yiliga esa 600 ming yevro maosh olishi haqida xabarlar tarqalgandi.

O‘runov “Spartak” safida 9 ta o‘yin o‘tkazib, 1 ta golga mualliflik qilgan.