Hukumatning parlamentdagi chiqishlari masalasi konstitutsion mustahkamlab qo‘yilishi mumkin. Bu haqda 17-may kuni Konstitutsiyaviy komissiyaning yig‘ilishida Oliy Majlis qonunchilik palatasi a’zosi Sharofiddin Nazarov taklif berdi.
Konstitutsiyaviy komissiyaning yig‘ilishida komissiya a’zolari tomonidan kelib tushayotgan takliflar ko‘rib chiqildi va yig‘ilish ishtirokchilarining tahlillari tinglandi.
Oliy Majlis qonunchilik palatasi a’zosi Sharofiddin Nazarov ikki masala bo‘yicha taklif berdi.
Nazarov hukumatning parlamentdagi chiqishlari masalasini konstitutsion mustahkamlab qo‘yishni tavsiya qildi.
Konstitutsiyaviy komissiya raisi Akmal Saidov taklifni qo‘llab-quvvatlab, jumladan, shunday dedi: “Bu mamlakat siyosiy hayotida parlamentning rolini oshiradi. Parlament nazorati kuchayishiga sabab bo‘ladi”.
Yana bir taklif — bola huquqlari bo‘yicha vakil saylanishi masalasini konstitutsiyada mustahkamlash masalasi. Ushbu taklif ko‘rib chiqish uchun Qonunchilik palatasiga jo‘natiladigan bo‘ldi.
Avvalroq Konstitutsiyaviy komissiyaning yig‘ilishida nikohga oid bandiga o‘zgartirish kiritish, dam olish huquqiga oid moddasiga o‘zgartirish kiritish, davlat va jamiyat o‘zaro bir-birini tiyib turishini mustahkamlash kabi takliflar bildirilgan edi.
Izoh (0)