Ҳукуматнинг парламентга ҳисоботлари конституцияда мустаҳкамлаб қўйилиши мумкин

Ҳукуматнинг парламентдаги чиқишлари масаласи конституцион мустаҳкамлаб қўйилиши мумкин. Бу ҳақда 17 май куни Конституциявий комиссиянинг йиғилишида Олий Мажлис қонунчилик палатаси аъзоси Шарофиддин Назаров таклиф берди.

Конституциявий комиссиянинг йиғилишида комиссия аъзолари томонидан келиб тушаётган таклифлар кўриб чиқилди ва йиғилиш иштирокчиларининг таҳлиллари тингланди. 

Олий Мажлис қонунчилик палатаси аъзоси Шарофиддин Назаров икки масала бўйича таклиф берди.

Назаров ҳукуматнинг парламентдаги чиқишлари масаласини конституцион мустаҳкамлаб қўйишни тавсия қилди.

Конституциявий комиссия раиси Акмал Саидов таклифни қўллаб-қувватлаб, жумладан, шундай деди: «Бу мамлакат сиёсий ҳаётида парламентнинг ролини оширади. Парламент назорати кучайишига сабаб бўлади».

Яна бир таклиф — бола ҳуқуқлари бўйича вакил сайланиши масаласини конституцияда мустаҳкамлаш масаласи. Ушбу таклиф кўриб чиқиш учун Қонунчилик палатасига жўнатиладиган бўлди.

Аввалроқ Конституциявий комиссиянинг йиғилишида никоҳга оид бандига ўзгартириш киритиш, дам олиш ҳуқуқига оид моддасига ўзгартириш киритиш, давлат ва жамият ўзаро бир-бирини тийиб туришини мустаҳкамлаш каби таклифлар билдирилган эди.