Ukraina prezidenti Vladimir Zelenskiy iyun oyi oxirida bo‘lib o‘tadigan G7 va NATO sammitlarida ishtirok etish taklifini qabul qildi.
“Federal kansler Olaf Sholsning Germaniyadagi G7 sammitida, NATO bosh kotibi Yens Stoltenbergning Madriddagi NATO sammitida ishtirok etish haqidagi takliflarini minnatdorchilik bilan qabul qildim”, — deb yozgan Zelenskiy Twitter’da.
Ukraina prezidenti tadbirlarda shaxsan qatnashmoqchimi yoki videoaloqa orqali ishtirok etmoqchimi, aniqlik kiritmagan.
Zelenskiyning NATO sammitiga taklif qilingani haqida alyans bosh kotibi Yens Stoltenberg Bryusselda ittifoqchi davlatlar mudofaa vazirlari yig‘ilishi oldidan o‘tkazilgan matbuot anjumanida ma’lum qilgan edi. Stoltenbergning so‘zlariga ko‘ra, u Ukraina prezidentini shaxsan ko‘rishdan xursand bo‘ladi, “lekin buning iloji bo‘lmasa, Zelenskiy yetakchilarga videoaloqa orqali murojaat qilishi mumkin”.
NATO sammiti 28—30-iyun kunlari Madridda bo‘lib o‘tadi. Ukrainaning tadbirdagi ishtiroki yanvar oyida Zelenskiy va Stoltenberg tomonidan muhokama qilingan edi. Stoltenbergning ta’kidlashicha, uchrashuvda Ukrainaga “Sovet davridagi eski qurollardan zamonaviy NATO qurollariga o‘tishga va hamkorlikni yaxshilashga yordam beradigan” yangi yordam paketi e’lon qilinishi mumkin.
Bundan tashqari, blok a’zolari Shimoliy Atlantika alyansining yangi konsepsiyasini qabul qilishi kutilmoqda, unda NATOning xavfsizlik, chaqiriq va imkoniyatlar sohasidagi asosiy vazifalari belgilab olinadi. Xususan, alyans Rossiyaga nisbatan munosabatini qayta ko‘rib chiqmoqchi va hujjatga Xitoy bo‘yicha qoidalarni kiritmoqchi, dedi Italiyaning NATOdagi vakili Franchesko Mariya Talo. Unga ko‘ra, sammit mavzularidan biri Ukrainadagi vaziyat bo‘ladi. Ukraina alyansga kirishga intilmoqda, NATO esa unga nisbatan “ochiq eshiklar” siyosatiga amal qiladi. Shu bilan birga, Zelenskiy mart oyi boshida Rossiya bilan qarama-qarshilikdan xavfsirab, mamlakatning alyansga a’zoligi masalasidan “sovib qolganini” aytgandi. Moskva Ukrainaning NATOga kirishiga qarshi.
“Katta yettilik” davlatlari (AQSh, Germaniya, Buyuk Britaniya, Italiya, Fransiya, Kanada va Yaponiya) rahbarlarining uchrashuvi esa 26—28-iyun kunlari Germaniya janubidagi Bavariyaning Elmau qasrida bo‘lib o‘tadi. Bu yil assotsiatsiyaga Germaniya raislik qilmoqda. AQSH Davlat departamenti sammitda, xususan, Rossiyaga qarshi sanksiyalar muhokama qilinishini aytdi. G‘arb davlatlari, jumladan G7 davlatlari Ukrainaga qurol yetkazib bermoqda. Rossiya esa buni “harbiy jinoyat” deb hisoblamoqda.
Izoh (0)