Yer yuzidagi voyaga yetgan aholining 770 milliondan ziyodi, shu jumladan, 126 million nafar yoshlar o‘qishni yoki yozishni bilmaydi. Bu haqda UNESCO bosh direktori Odri Azule Marokashda bo‘lib o‘tayotgan VII Kattalar ta’limi bo‘yicha xalqaro anjumanda videoaloqa orqali nutq so‘zlayotib aytib o‘tdi, deb yozadi “RBK”.
“Dunyoda 770 milliondan ortiq katta odamlar va 126 million yoshlar oddiy iboralarni ham o‘qishni yoki yozishni bilmaydi”, — dedi u, bu raqamlarning uchdan ikki qismini ayollar tashkil qilishini ta’kidlab.
BMT bosh kotibi Antoniu Guterrish 2019-yil aprelida BMT aholi va taraqqiyot bo‘yicha komissiyasiga taqdim etgan hisobotda Yer aholisi soni 7,7 milliard kishiga yetgani aytilgandi. Shu tariqa, butun dunyo bo‘ylab odamlarning taxminan 10 foizi savodsiz bo‘lib qolmoqda.
Kattalarga ta’lim berish bo‘yicha xalqaro anjuman BMTning barqaror rivojlanish maqsadlariga erishishga imkon yaratishi ko‘zda tutilgan. Ushbu maqsadlardan biri — Yerning barcha aholisi uchun keng qamrovli va sifatli ta’limni ta’minlash va butun hayoti davomida o‘qish imkoniyatini qo‘llab-quvvatlash. Bu yil tadbir oltinchi marta o‘tkazilmoqda, uning asosiy mavzusi — “Barqaror rivojlanish manfaatlari yo‘lida kattalarni o‘qitish va ta’lim berish: qayta o‘qitish dasturi”.
Turki yillarda olingan BMT va UNESCO ma’lumotlariga ko‘ra (statistika davlatga qarab turli davriylikda yangilanadi, shu sababli ba’zi hollarda ma’lumotlar besh yil avvalgi yoki undan ham eskiroq bo‘lishi mumkin), aholi orasida savodxonlikni rivojlantirish bo‘yicha eng jiddiy muammolarga Afrika mamlakatlari duch kelmoqda. Ushbu ko‘rsatkich bo‘yicha antirekord Somaliga tegishli, u yerda 15 yosh va undan katta aholining 5 foizigina o‘qish va yozishni biladi. Ikkinchi o‘rinda Chad (22%), uchinchida — Mali (31%). Shuningdek, aholi orasida savodxonlik eng kam rivojlangan mamlakatlar o‘nligiga Afg‘oniston va Markaziy Afrika Respublikasi (37 foizdan), Burkina-Faso (39%), Gvineya (40%), Gvineya-Bisau (42%), Syerra-Leone (43%) va Liberiya (48%) kiradi.